Përfaqësuesi i koalicionit VAKAT, Rasim Demiri ka shprehur gatishmërinë për të bashkëpunuar me kryeministrinë në detyrë të Kosovës, Albin Kurti për formimin e institucioneve të reja pas zgjedhjeve të 9 shkurtit.
Demiri këtë deklaratë e bëri pas takimit që pati me kryetarin e Lëvizjes Vetëvendosje, Albin Kurti, takim ky i cili është mbajtur në vazhdën e takimeve me pakicat për formimin e qeverisë së re.
“Më herët, edhe kur ka qenë Qeveria Kurti I edhe Qeveria Kurti II, ne kemi pasur bashkëpunim me kryeministrin. Shpresoj që edhe tash kemi me pas bashkëpunim. Sot kemi pasur një takim të rëndësishëm, kemi biseduar shumë gjëra. Edhe kryeministri ka gatishmëri, edhe ne kemi gatishmëri për formimin e institucioneve dhe Qeverinë e Kosovës”, u shpreh ai.
Ai tha se krijimi i një komune të komunitetit boshnjak nuk është kusht, por e ka mirëpritur faktin që me kreun e Lëvizjes Vetëvendosje, Albin Kurti kanë pas mundësi ta shtrojnë edhe këtë temë.
“Ne prej Vakat jemi ata që duhet dhe do të kërkojmë sepse kemi marr besimin tek populli. Atë që po bënë dikush tjetër që pas zgjedhjeve ka qenë kusht për formimin e qeverisë tash qysh kem parë edhe sot nuk është kusht por është si një kërkesë. Kjo është manipulim me njerëzit që jetojnë në atë pjesë…. Adresa për komunën e Reçanit është koalicioni Vakat…Nuk mundet me qenë kusht, ne kurrë se kemi pas si kusht edhe më herët kur kemi kërkuar nuk ka qenë kusht vetëm po më vije mirë që ka hapësirë të bisedojmë për komunën”, tha ai.
Një zyre e Kosovës në Bosnje e Hercegovinë është kërkesa që koalicioni VAKAT e ka adresuar tek Kurti, dhe e cila sipas Demirit ka marr përgjigje pozitive.
“Ata që kam kërkuar prej kryeministrit kemi kërkuar që Republika e Kosovës me pas një zyre në Bosnje dhe Hercegovinë siç është një në në Greqi që e kemi… kemi biseduar me kryeministrin ka qenë propozimi i koalicionit VAKAT kryeministri e ka pranuar dhe besoj që kanë me punua edhe Bosnja dhe Hercegovina me pas këtu një zyrë në Kosovës, edhe Qeveria e Kosovës me pas një zyre në Sarajevë, kryeministri e ka pranuar dhe besoj që do ta bëjmë“, tha ai.
I pyetur nëse do të votojnë ndonjë qeveri të formuar nga opozita, Demiri tha se për këtë do të vendos partia.
Kurti sot takoi edhe Fikrim Damka nga Partia Demokratike Turke e Kosovës, dhe kryetaren e partisë Unioni Social Demokrat, Duda Balje, si dhe kryetarin e Partisë Rome të Bashkuar të Kosovës, Albert Kinolli.
Gjatë ditës së djeshme Albin Kurti ka bërë të ditur se ka filluar konsultimet me komunitetet jo shumicë për formimin e qeverisë së re. Ai tha të mërkurën se ka takuar kryetaren e Partisë së Re Demokratike (NDS) nga komuniteti boshnjak, Emilija Rexhepi, kryetarin e Partisë për Liri, Drejtësi dhe Mbijetesë nga komuniteti serb, Nenad Rashiq, si dhe kryetarin e partisë Iniciativa e Re Demokratike e Kosovës (IRDK), Elbert Krasniqi, ku diskutuan mbi formimin e qeverisë së re.
Kujtojmë, Lëvizja Vetëvendosje ka fituar zgjedhjet parlamentare të 9 shkurtit, me 42.3 për qind. E dyta renditet, PDK me 20.95 për qind, pasuar nga LDK 18.27 për qind dhe koalicioni AAK-Nisma 7.06 për qind. Në bazë të këtyre shifrave, Lëvizja Vetëvendosje do t’i ketë 48 deputetë, PDK 24, LDK 20, AAK-Nisma 8, dhe komunitetet jo shumicë 20 ulëse të rezervuara./kp/
