Shkup, 2 shkurt – Kursimet e qytetarëve të cilat i ruajnë në sektorin bankar në dhjetor kanë arritur në nivel prej 6,4 miliard euro, duke shënuar kështu rritje prej 13,8 % në nivel vjetor, tregojnë të dhënat e fundit të Bankës Popullore. Drejtori i Fondit për Sigurimin e Depozitave Behar Emini për TVM-2 thotë se kjo rritje është si rezultat i stabilitet financiar në vend si dhe normave të volitshme të interesit. Ai shton se pjesa më e madhe e depozitave të qytetarëve janë të siguruara apo rreth 4,5 miliard euro.
“Ky rezultat është një tregues i qartë i sistemit financiar dhe besimit që qytetarët dhe kompanitë e kanë në sektorin bankar. Rritja e depozitave pa diskutim se është ndikuar nga disa faktorë përfshirë mjedisin makroekonomik të qëndrueshëm, normat e favorshme të interesit dhe përmirësimi i edukimit financiar. Deri në dhjetor depozitat janë të siguruara në vlerë prej 71% ose 276 miliard denarë duke ofruar një nivel të lartë të mbrojtjes për kursimtarët dhe duke rritur besimin në sistemin bankar. Në praktikë kjo do të thotë se qytetarët kanë një mbrojtje në shumë totale prej 4 miliard e gjys euro të cilat sigurohen nga fondi i sigurimit të depozitave.”, u shpreh drejtori i Fondit të Sigurimit të Depozitave Behar Emini.
Emini shton se në rast të falimentimit të ndonjë institucioni financiar Fondi mbulon depozitat e qytetarëve në vlerë deri në 30 mijë euro, janë në përgatitje të ligjit të ri ku parashihet që ky prag të rritet në 50 mijë euro.
“Në rast të falimentimit të ndonjë banke shumë e cila mbulohet nga fondi i sigurimit të depozitave arrin vlerën në 30 mijë euro në kundërvlerë të denarit. Vlen të theksohet se kjo ka të bëjë me deponentë në një bankë. Në rast se qytetarët depozitat e tyre i shpërndajnë nëpër banka vlerat e tyre mbulohet deri në 30 mijë euro. Me ligjin e ri i cili është në përgatitje e sipër është se shuma e cila mbulohet për qytetarët në 30 mijë euro do të ketë një ndryshim deri në 50 mijë euro për deponentën në një bankë.”, tha Emini.
Rasti i fundit i falimentimit të një banke në vendin tonë ishtë në vitin 2020 ku falimentoi banka Eurostandard. Emini shton se Fondi ka pasur obligim të paguajë rreth 68 milion euro ku deri tani kanë paguar rreth 62 milion euro ndërsa kanë mbetur të paguhen 5 milion euro.
