Shkup, 23 maj – Sekretarja e përgjithshme e Kuvendit, Marina Dimovska, mbajti fjalim në Takimin e 4-t të Sekretarëve të Përgjithshëm të Asamblesë Parlamentare të Mesdheut (APM), në kuadër të Tryezës së Rrumbullakët me temë: “Kontributi i Asamblesë Parlamentare të Mesdheut në Paktin e ri të BE-së për Mesdheun”, që po mbahet në Marrakesh, Marok, informojnë nga pres-shërbimi i Kuvendit.
“Pakti i ri i BE-së për Mesdheun përfaqëson më shumë sesa një kornizë politike, është angazhim i ripërtërirë ndaj vlerave të përbashkëta: solidaritetit, dinjitetit njerëzor, zhvillimit të qëndrueshëm, sigurisë dhe paqes. APM-ja është shtyllë vendimtare në këtë proces – si zëri i popullit dhe si forum për dialog gjithëpërfshirës, harmonizim ligjor dhe veprim të koordinuar”, theksoi Dimovska.
Sipas saj, duke qenë se vendi ynë ka qenë në sallën e pritjes së BE-së për shumë vite për shkak të çështjeve dypalëshe, angazhimi për bashkëjetesë, bashkëpunim dhe partneritet duhet të jetë i ndërsjellë dhe i sinqertë. Si vend, mbetemi plotësisht të përkushtuar ndaj reformave dhe harmonizimit me standardet e BE-së.
“Kontributi, si Kuvend dhe si Asamble Parlamentare e Mesdheut, është thelbësor në fushën e stabilitetit dhe sigurisë, në përballimin e sfidave të përbashkëta si migracioni, lufta kundër terrorizmit, krimi i organizuar, siguria kibernetike. Si anëtarë të APM-së, tha Dimovska, duhet të përqendrohemi në zhvillimin e qëndrueshëm dhe veprimin klimatik, por edhe në tranzicionin e gjelbër dhe të drejtë. Përmes APM-së, kemi mundësinë t’i shndërrojmë ambiciet legjislative në politika rajonale praktike – në lidhjen energjetike, ekonominë qarkulluese, teknologjitë e pastra dhe infrastrukturën rezistente ndaj ndryshimeve klimatike. Si vend, jemi veçanërisht të përqendruar në politikat rinore, për një të ardhme më të mirë dhe më të begatë për të rinjtë dhe për parandalimin me largimin e intelektualëve”, ka thënë sekretarja e përgjithshme e Kuvendit, Dimovska.
Siç ka theksuar në fjalim, diplomacia parlamentare dhe bashkëpunimi rajonal janë mjete të domosdoshme për ndërtimin e paqes dhe progresit. Vetëm përmes dialogut dhe unitetit mund t’i kapërcejmë të gjitha sfidat dhe të ecim drejt përparimit demokratik dhe prosperitetit, përfundoi sekretarja e përgjithshme e Kuvendit.
