Shkup, 23 maj – Fuad Halimi ka njoftuar dorëheqjen e tij nga posti i zëvendësdrejtorit të Fondit Pensional dhe Invalidor të Maqedonisë së Veriut, një vendim që thotë se e ka marrë me ndërgjegje të qetë.
Në një postim publik, ai theksoi se detyrën nuk e mori për privilegje personale, por për të shërbyer me ndershmëri qytetarëve.
Halimi tha se, megjithëse për pesë muaj u përpoq t’i qëndronte afër nevojave të njerëzve, nuk arriti të realizonte sa kishte dëshiruar. Ai falënderoi bashkëpunëtorët, familjen dhe qytetarët për mbështetjen dhe shprehu mbështetjen e tij të vazhdueshme për liderin Arben Taravarin.
Në përmbyllje, ai theksoi rëndësinë e ruajtjes së miqësisë përtej bindjeve politike, edhe pse, siç u shpreh, “disa ‘intelektualë’ kanë filluar të na shohin si armiq”.
Nazmi Taipi ka njoftuar dorëheqjen e tij nga posti i zëvendësdrejtorit në Ndërmarrjen Publike për Rrugët Shtetërore të RMV-së, pas një reflektimi të thellë mbi pamundësinë për të përfaqësuar denjësisht interesat e qytetarëve në kushte që ai i cilëson si të papërshtatshme.
Taipi theksoi se gjatë mandatit të tij ka ndjekur me përkushtim disa projekte strategjike, përfshirë Korridorin 8 dhe rrugët Tetovë–Jazhincë dhe Trebosh–Neproshten. Megjithatë, ai denoncoi zvarritje të qëllimshme dhe mungesë vullneti për investime në zonat shqiptare, si dhe neglizhencën institucionale ndaj gjuhës shqipe.
Ai shprehu mirënjohje për kreun e Aleancës për Shqiptarët, Arben Taravari, dhe njoftoi se do të vazhdojë angazhimin e tij politik me të njëjtin përkushtim.
