Këtë vit, më 2 shtator shumë nxënës do t’i kthehen bankave shkollore, e disa nga ta në këto banka do të ulen për herë të parë.
Në një intervistë për Telegrafin, Udhëheqësi i Sektorit të Arsimit, në Drejtorinë e Arsimit në Komunën e Gjakovës, Zymber Berisha, foli për përgatitjet që janë bërë nga kjo komunë për fillimin e vitit të ri shkollor.
Berisha po ashtu shtoi se kanë vërejtur edhe një rënie të numrit të nxënësve në Komunën e Gjakovës.
“Deri më tani nuk kemi hasur në ndonjë problem, dhe gjithçka ka shkuar në rregull, por shihet që numri i nxënësve çdo vit është në rënie. Sipas planifikimit që kemi bërë si Drejtori e Arsimit në nivel komune numri i nxënësve nuk është aq i madh krahasuar me vitin paraprak, por që ka diferencë, dhe pritet që këtë vit të kemi më pak nxënës të regjistruar në bankat shkollore, krahasuar me vitin e kaluar”, shtoi ndër të tjera Berisha.
