Shkup, 26 mars – Duhet të reagojmë me mençuri dhe me kohë, porositi kryetari i ASHAM-it, Zhivko Popov në prezantimin e tij në Kuvendin e rregullt vjetor të Akademisë, duke u përqëndruar në politikën e jashtme të vendit dhe pozicionimin e tij në renditjen e re politike në botë.
Ai theksoi se perspektiva e proceseve eurointegruese të vendit është “plotësisht e bllokuar nga mosmarrëveshja irracionale me fqinjët tanë” dhe se është “shumë pozitive dhe nuk duhet neglizhuar” ajo se ka pasur një “përmirësim të ndjeshëm në marrëdhëniet tona me administratën amerikane të udhëhequr nga presidenti Tramp”.
“Kjo shumicës së popullit të Maqedonisë i jep shpresë se mund të marrë mbështetje në zgjidhjen e mosmarrëveshjes dypalëshe me Bullgarinë dhe në përmirësimin e marrëdhënieve me Brukselin. Republika e Maqedonisë nuk mund të jetë e kursyer nga pasojat e luftës në Ukrainë dhe duhet të gjejë vendin e saj të sigurt në botë, siç dëshmojnë përpjekjet diplomatike të Qeverisë, që vendi të mbështetet nga partnerë të shumtë strategjikë, nga të cilët vetëm do të përfitojë vendi. Në një situatë të tillë, duhet të reagohet me mençuri dhe në kohën e duhur. Rruga evropiane, megjithatë, është alternativa jonë e vetme e vërtetë dhe reale, sepse ne jemi evropianë para së gjithash, e po ashtu edhe Bashkimi Evropian është gjithashtu i vetëdijshëm se kontinenti evropian nuk do të jetë kurrë i plotë pa Ballkanin Perëndimor dhe për këtë arsye zgjerimi i BE-së po bëhet sërish një prioritet që nuk duhet ta humbasim. BE-ja na nevojitet si një komunitet shumë i zhvilluar ekonomiko-politik që mund të na ndihmojë të arrijmë standardet dhe vlerat e saj”, tha kryetari i ASHAM-it.
Ai shtoi se rruga evropiane në Ballkanin Perëndimor “është edhe një herë në provë dhe në një udhëkryq, pavarësisht vullnetit dhe dëshirës së qartë të pothuajse të gjitha vendeve fqinje”.
Lidhur me kontestin me fqinjët, me të cilët, tha ai, “kemi jetuar krah për krahu me shekuj, me apo pa kufi”, ai konsideron se është i shkëlqyer propozimi për një efekt të vonuar të ndryshimeve kushtetuese, që, siç tha ai, “paraqet bazë solide për kompromis”.
“Kontaktet mes shkencëtarëve nga të dy palët, rivendosja e projekteve shkencore, bashkëpunimi në kulturë, lidhjet infrastrukturore dhe kontaktet e shpeshta në të gjitha nivelet, kuptohet duke respektuar dinjitetin tonë kombëtar, mund të jenë urë, në të cilën do të takohen politikanët nga të dyja palët për të gjetur një kompromis”, shtoi kryetari i ASHAM-it.
