Në Shqipëri, prodhimi ka pësuar rënie në të gjithë sektorët, përveç ndërtimit. Statistikat e fundit të INSTAT për tremujorin e fundit të vitit 2024 tregojnë një ulje të ndjeshme në industri, energji dhe trajtimin e mbetjeve.
Në sektorin industrial, shitjet neto ranë me 14.4 për qind, ndërsa prodhimi në volum me 13.7 për qind. Po ashtu, numri i të punësuarve dhe fondi i pagave kanë rënë përkatësisht me 6.5 për qind dhe 1.9 për qind.
Në prodhimin e energjisë, rënia ishte 0.8 për qind në shitje dhe 13.5 për qind në volum, ndërsa punësimi u tkurr me 6 për qind. E vetmja rritje u shënua në fondin e pagave, me 4 për qind.
Ndërkohë, ndërtimi është i vetmi sektor prodhues që vijon rritjen. Në fund të vitit 2024, shitjet u rritën me 2.7 për qind, prodhimi në volum me 1.9 për qind dhe numri i të punësuarve me 1.8 për qind. Ndërkohë, fondi i pagave për këtë sektor u rrit me 16.9 për qind.
Edhe sektori i teknologjisë dhe informacionit u rrit me 8.7 për qind në shitje dhe punësim, ndërsa turizmi dhe agjencitë e udhëtimit panë rritje të punësimit me 12.7 për qind dhe të fondit të pagave me gati 20 për qind.
Me prodhimin në rënie dhe shërbimet në rritje, ekonomia shqiptare po shkon drejt një strukture ku sektori i shërbimeve bëhet gjithnjë e më i rëndësishëm.
