Shkup, 26 mars – Nën sloganin “Inspirim për çdo shtëpi” prej sot e deri më 30 mars do të mbahet “Panairi i mobilieve 2025” në kompleksin “Boris Trajkovski” në Shkup.
Panairi i mobilieve këtë vit do të organizohet në katër zona speciale: oborr dhe kopsht, aksesorë për shtëpinë dhe ndriçimin, mobilie dhe dizajn i brendshëm dhe artizanat dhe industri të ngjashme, me çka do tu mundësohet vizitorëve më lehtë t’i zbulojnë trendet më të reja dhe të gjejnë gjithçka që është e nevojshme për rregullimin e shtëpisë ose hapësirës së punës.
“Nëse ju nevojitet freskim i shtëpisë ose hapësirës së punës ose thjeshtë vetëm dëshironi të kënaqeni në mobilie të bukura dhe dekorime, vizitoni Panairin e mobilieve dhe gjeni frymëzimin tuaj. Në Panair do të prezantohen brende të shumta me ofertë të shkëlqyer dhe zbritje të mëdha panairi”, paralajmërojnë organizatorët.
Çmimi i biletave është 150 denarë për një vizitor, gjegjësisht 250 denarë për dy bileta, për dy vizitorë të panairit. Për fëmijë deri 12 vjet bashkë me prind, hyrja është falas. Biletat mund të blihen në biletaritë në hyrje të Panairit të mobilieve. Hyrja kryesore për vizitorë do të shënohet dhe do të gjendet nga ana e pasme e Arenës Boris Trajkovski (ana e patinazhit).
Një pjesë e mjeteve nga biletat do të dhurohen në Fondin e Solidaritetit në Kryqin e Kuq, si mbështetje për familjet e të vdekurve dhe të lënduarve në tragjedinë në Koçan. Në këtë ngjarje do të vendosen kuti speciale për donacione nga Kryqi i Kuq.
