Shkup, 3 mars, argument.mk/ – Grupi parlamentar i Frontit Evropian ka reaguar ashpër ndaj vendimit të Qeverisë për të tërhequr nga procedura parlamentare Propozim-ligjin për lojërat e fatit, duke e cilësuar këtë hap si të pakuptueshëm dhe joserioz, transmeton argument.mk/.
Sipas reagimit të Grupi parlamentar i Frontit Evropian, ligji ishte prezantuar si një prioritet me qëllim mbrojtjen e qytetarëve dhe familjeve, si dhe rregullimin e një sektori të ndjeshëm. Megjithatë, tërheqja e tij pa asnjë sqarim publik, sipas tyre, tregon mungesë konsistence dhe përgjegjësie në politikëbërje.
Nga Grupi parlamentar i Frontit Evropian theksojnë se qytetarët meritojnë transparencë dhe seriozitet nga institucionet, e jo vendime të paqarta dhe të paqëndrueshme.
Ata rikujtojnë se, sipas të dhënave, sektori i lojërave të fatit gjatë vitit të kaluar ka realizuar qarkullim prej rreth 2.7 miliardë eurosh, që përbën afërsisht gjysmën e buxhetit të shtetit. Sipas tyre, kjo është dëshmi se ky sektor kërkon rregullim serioz dhe jo tërheqje të paarsyetuara të ligjeve.
Në reagim thuhet gjithashtu se, në vend të kufizimit, Qeveria ka stimuluar këtë aktivitet, duke ngritur pikëpyetje mbi qëndrueshmërinë e politikave të saj.
Grupi parlamentar i Frontit Evropian ka drejtuar kritika edhe ndaj përfaqësuesve të VLEN-it, duke theksuar se nëse nuk janë në gjendje të qëndrojnë pas premtimeve dhe politikave që vetë i promovojnë, duhet të japin përgjegjësi të qartë para qytetarëve.
Në fund, ata vlerësojnë se luhatjet dhe vendimet e paarsyetuara në çështje kaq të rëndësishme përbëjnë jo vetëm dështim politik, por edhe dëm të drejtpërdrejtë ndaj interesit publik dhe besimit të qytetarëve në institucione.
