Reperi i njohur nga Peja, Asdren Gjikolli – Gjiko, ka ndarë së fundmi me ndjekësit e tij një moment të veçantë.
Përmes një postimi në InstaStory, ai zbuloi se është takuar me ambasadorin e njohur William Walker, një figurë historike për Kosovën dhe popullin e saj.
Në fotografi, Gjiko dhe Walker shihen duke darkuar së bashku, një moment që reperi e ka cilësuar si tejet domethënës. Në mbishkrimin e fotografisë, Gjiko ka shkruar: “Të takoja William Walker ishte një nder i vërtetë, dhe e falënderoj thellësisht për çdo gjë që ai ka bërë për popullin tonë”.
Ky takim ka zgjuar reagime pozitive në rrjetet sociale, duke rikujtuar rolin historik të Walker-it në raportimin e masakrës së Reçakut dhe angazhimin e tij për çështjen e Kosovës.
Gjiko, i cili shpesh ka shprehur krenarinë për rrënjët dhe historinë e vendit të tij, këtë herë ka dëshmuar respektin dhe mirënjohjen për një figurë që ka dhënë kontribut të jashtëzakonshëm për lirinë dhe të ardhmen e Kosovës.
Kjo fotografi nuk është vetëm një kujtim personal për reperin, por edhe një mesazh që përforcon rëndësinë e ruajtjes së lidhjeve dhe respektit për ata që kanë kontribuar në kauzën e popullit shqiptar.
