Pasuri me vlerë tregu rreth 1 milion euro janë konfiskuar pas vendimit të Gjykatës së Posaçme të Shkallës së Parë për Korrupsionin dhe Krimin e Organizuar, me qëllim kalimin në favor të shtetit.
Policia e Tiranës njofton se është finalizuar operacioni “Resemblance”, i kryer nga Seksioni për Hetimin e Pastrimit të Parave dhe Aseteve Kriminale në bashkëpunim me Agjencinë e Administrimit të Aseteve të Sekuestruara dhe Konfiskuara.
Në kuadër të këtij operacioni u bë ekzekutimi i vendimit të Gjykatës së Posaçme të Shkallës së Parë për Korrupsionin dhe Krimin e Organizuar, datë 07.02.2024, lënë në fuqi më datë 23.10.2024 të Gjykatës së Posaçme të Apelit për Korrupsionin dhe Krimin e Organizuar.
Në zbatim të këtij vendimi u bë konfiskimi i pasurive të luajtshme dhe të paluajtshme:
- Një njësi me sipërfaqe 30 m², në emër të shtetasit R. Rr.;
- Një njësi me sipërfaqe 76 m², në emër të shtetasit R. Rr.;
- Një njësi me sipërfaqe 127.5 m², në emër të shtetases M. Ç.;
- Një njësi me sipërfaqe 18.09 m², në emër të shtetases M. Ç.;
- Një njësi me sipërfaqe 18.09 m², në emër të shtetases M. Ç.;
- Një automjet në pronësi të shtetasit R. Rr.;
- Një automjet në pronësi të shtetases K. K.;
- Një orë dore (Rolex).
Sipas Policisë, “pasuritë e mësipërme, të cilat kanë një vlerë tregu rreth 1 milion euro, u konfiskuan me qëllim kalimin në favor të shtetit dhe ju dorëzuan Agjencisë së Administrimit të Aseteve të Sekuestruara dhe Konfiskuara”.
Materialet i kaluan për ndjekje të mëtejshme Prokurorisë së Posaçme Kundër Korrupsionit dhe Krimit të Organizuar.
