Gjyqtari Erjon Bani, i cili më herët la në fuqi masën e arrestit me burg për kryebashkiakun e Tiranës, Erion Veliaj, pritet të shqyrtojë këtë të hënë ankimin e Ajola Xoxës lidhur me sekuestrimin e celularit të saj gjatë kontrolleve të kryera në fillim të dhjetorit të vitit të kaluar.
Seanca gjyqësore është planifikuar të zhvillohet në orën 13:30 me dyer të mbyllura. GJKKO ka lehtësuar masën ndaj Xoxës nga arrest shtëpie në detyrim paraqitjeje. Ende nuk është e qartë nëse ajo do të jetë e pranishme personalisht në seancë apo do të përfaqësohet nga avokati i saj.
Nga të dhënat e mbledhura deri në këtë fazë të hetimit paraprak, Prokuroria e Posaçme kundër Korrupsionit dhe Krimit të Organizuar ka ngritur akuza të rënda ndaj kryebashkiakut të Tiranës, Erion Veliaj, dhe bashkëshortes së tij, Ajola Xoxa.
SPAK konfirmon se Veliaj akuzohet për “korrupsion pasiv të funksionarëve të lartë shtetërorë ose të zgjedhurve vendorë” në 9 raste, si dhe për “pastrim të produkteve të veprës penale ose veprimtarisë kriminale”. Ndërkohë, ndaj Ajola Xoxës rëndojnë akuzat për korrupsion pasiv, pastrim parash dhe fshehje pasurie.
