Shkup, 9 maj Zhurnal.mk – Ish-kryeministri i Maqedonisë së Veriut, Nikolla Gruevski, i cili ndodhet në Hungari, është paraqitur këtë mbrëmje me një reagim në rrjetet sociale, duke shpërndarë një koment të Jane Çento dhe duke folur për, siç e quan ai, “përndjekje brutale politike” në vend.
Në postimin e tij në Facebook, Gruevski shkruan se deklarata e Jane Çentos është dëshmi shtesë për mënyrën se si janë zhvilluar proceset gjyqësore ndaj personave të caktuar në Maqedoni.
“Nëse ka ende dikush në Maqedoni që vazhdon të ketë sadopak dyshim për ekzistimin e një përndjekjeje brutale politike, ja edhe një deklaratë tjetër, kësaj radhe dëshmi nga Jane Çento, nipi i Metodija Andonov-Çentos”, shkruan Gruevski.
Ai shton se, sipas tij, edhe rastet e tjera gjyqësore janë zhvilluar me të njëjtat metoda dhe presione.
“Nëse dikush mendon se në rastet e tjera gjyqësore ka qenë ndryshe nga kjo, le ta dijë menjëherë se ka qenë e njëjta gjë. Të njëjtat metoda”, deklaron më tej Gruevski.
Sipas ish-kryeministrit, disa persona nuk kanë arritur t’i përballojnë presionet, ndërsa të tjerët, siç thotë ai, kanë mbetur “të lirë dhe krenarë për dinjitetin dhe qëndrueshmërinë e tyre”.
