Shkup, 20 shkurt – Himni është këngë solemne që i kushtohet atdheut dhe mbahet si simbol i njësisë së kombit e të shtetit. Prandaj, secili qytetarë e ndjen atë himn teksti i të cilit përshkruan lidhshmërinë me të kaluarën, ngjallë ndjenjën e guximit dhe të krenarisë. Sërish është riaktualizuar tema e himnit tani me një gjë shtesë atë të stemës. Pra, po flasim për qeverisjen e pushtetit të ri që po tenton të mjegullojë situatën në opinion me tema që mbase janë të rëndësishme por nuk janë prioritare për qytetarët e këtij vendi që janë të thelluar në varfëri ekstreme, shkruan Zhurnal.
Përse himni e stema tani kur qytetarët kanë nevojë për punësim e rritje të standardit jetësor?
Edhe përkundër faktit se edhe pas tërheqjes së Ligjit për intonimin e himnit në shkollat e vendit partitë shqiptare po vrapojnë pas meritave një gjë duhet të thuhet e shkruhet qartë e troç. Nëse ky ligj kishte kaluar nuk do mend se do të akuzoheshin për paaftësi partitë shqiptare pjesëmarrëse në koalicionin qeverisës, e tani këta do të fajësoheshin në rast se kalonte ligji tani meritat për mos kalimin e ligjit duhet të takojnë koalicionit VLEN.
Por, e rëndësishme është pa dallime partiake nga ky shfuqizim i ligj fituan shqiptarët, u fuqizuan edhe më shumë sepse nuk do të diskriminohen nga institucionet e shtetit. Intonimi i himnit maqedonas në shkollat shqiptare do të krijonte pakënaqësi te nxënësit shqiptarë që të dëgjojnë himn ku nuk janë të përfaqësuar fare.
Por, tani është e pakuptimtë që sërish edhe pas mbylljes së këtij debati sërish rikthehet në debat publik tema e himnit, kësaj radhe bashkangjitur edhe me stemën. Mbase, është debat i duhur por jo edhe në kohën e duhur. Sepse, qytetarët shqiptarë nga VLEN presin përmirësim të perspektivës së jetës së tyre, të ketë punësime të reja, të ketë rritje pagash, ulje të shpenzimeve të përgjithshme, e gjëra që ndikojnë në përmirësimin e drejtpërdrejt të jetesës së tyre.
E nëse analizohet se çfarë do tu sjellë ky debat në këtë kontekst kohor, përgjigja do të jetë asgjë. Jo, se nuk ka rëndësi himni e stema por për faktin e partnerit qeverisës që nuk ka vullnet reciprok për t’i hapur çështjet etnike. Pra, as nuk mund të bëhen këto punë e as nuk sjellë dobi diskutimi i tillë i ngritur.
E mbase të njëjtin mendim e ndajnë edhe qytetarët e këtij vendi se më shumë se për çështjet etnike qytetarët tanë kanë nevojë për ngritjen e kujdesin për çështjet etnike. Sepse, vetëm përmes kësaj mase mund të ndalen qytetarët në vend, pse jo të kthehen edhe ata që kanë lëshuar vendin. /Zhurnal.mk
