Shkup, 24 korrik – SPB Kumanov ka paraqitur kallëzim penal kundër K.P. (59), M.K. (41) dhe S.M. (38), të gjithë nga Kriva Pallanka, për shkak të dyshimeve të bazuara për kryerjen e veprës penale “keqpërdorim i pozitës dhe autorizimeve zyrtare”.
I pari i kallëzuar, K.P., i punësuar në komunën e Kriva Pallankës, në kundërshtim me Ligjin për ndërtim dhe në kundërshtim me detyrat dhe obligimet e tij të punës, ka përgatitur vendim për ndryshim të investitorit, megjithëse afati i lejes ndërtimore që kishte investitori kishte skaduar.
E dyta e kallëzuar, M.K. – udhëheqëse e Sektorit për Urbanizëm, Komunikacion dhe Mbrojtje të Mjedisit Jetësor në Komunën e Kriva Pallankës, në kundërshtim me detyrat dhe obligimet e saj të punës, nuk ka kryer mbikëqyrjen dhe kontrollin e nevojshëm mbi vendimin për ndryshim të investitorit dhe duke e nënshkruar atë, e ka aprovuar si të vlefshëm, duke i mundësuar G.S. nga Kriva Pallanka të vazhdojë ndërtimin e mëhershëm të një shtëpie me hapësirë afariste pa pasur një leje të vlefshme për ndërtim.
I treti i kallëzuar, si kryetar i Komunës së Kriva Pallankës, nuk ka kryer mbikëqyrjen dhe kontrollin e nevojshëm mbi vendimin e lëshuar për ndryshim të investitorit dhe me nënshkrim ose me facsimile dhe vulë të komunës e ka aprovuar atë si të vlefshëm.
