Spitali Rajonal i Lezhës, i cili tashmë ka marrë Kartën e Autonomisë Menaxheriale, po rikonstruktohet tërësisht duke rritur gamën e shërbimeve shëndetësore për të gjithë qytetarët e Lezhës.
Ministrja e Shëndetësisë dhe Mbrojtjes Sociale, Albana Koçiu ka përcjellë sot pamjet e punimeve që po kryhen në këtë spital, nga fasada e jashtme e godinës, te pjesa e brendshme, pavionet, e deri te hapësirat e pritjes për pacientët.
Ministrja Koçiu thotë se punimet për këtë spital janë drejt përfundimit, dhe falë “investimit të qeverisë dhe Ministrisë së Shëndetësisë dhe Mbrojtjes Sociale, rreth 200 mijë qytetarë të rajonit do të kenë akses në një infrastrukturë dinjitoze dhe shërbime shëndetësore të përmirësuara”.
“Një lajm i mirë ky për të gjithë mjekët, infermierët dhe gjithë stafin që punon në spitalin rajonal të Lezhës, por edhe për afro 200 mijë banorë dhe qytetarë të të gjithë rajonit që do të përfitojnë nga kushte shumë më bashkëkohore në këtë strukturë spitalore. Falë investimeve të vazhdueshme të qeverisë dhe MSHMS-së në aparatura bashkëkohore do të ofrohen shërbime të reja diagnostikuese dhe ekzaminuese”, është shprehur më herët ministrja Koçiu.
Spitali Rajonal Lezhë ofron shërbime në patologji, pediatri, shërbimin e Anestezi-reanimacionit, të kirurgjisë së përgjithshme, okulistikë, kujdes paliativ, kimioterapi, ortopedi si dhe shërbimin e obstetrikë-gjinekologjisë.
