Uashington, 21 janar – Zëvendëskryeministri i parë i Qeverisë së Maqedonisë së Veriut, Izet Mexhiti, ishte i ftuar si pjesëmarrës ekskluziv në ceremonitë madhështore të inaugurimit të Presidentit të Shteteve të Bashkuara, Donald Trump. Në një ngjarje që shënon një moment historik dhe prestigjioz, Mexhiti ishte i vendosur në sektorin VIP në mbrëmjen me Forcat e Armatosura të ShBA-së, ku të pranishëm ishin presidenti Trump dhe familja e tij. Madje në disa pamje Mexhiti ishte shfaqur në afërsi të presidentit Trump.
Kjo ngjarje ekskluzive ku Mexhiti ishte prezent ishte organizuar nga ushtarakët e të gjitha degëve të Forcave të Armatosura të SHBA-së, ku Presidenti Trump, në cilësinë e Komandantit të Përgjithshëm të tyre, kryesoi me praninë e tij. Kjo mbrëmje ishte një homazh për sakrificat dhe dedikimin e ushtarëve amerikanë, një simbol i forcës dhe bashkimit kombëtar.
Një ngjarje tjetër madhështore e organizuar në nder të inaugurimit presidencial “Ballo e Lirisë” mblodhi elitën politike dhe shoqërore të Shteteve të Bashkuara dhe botës. Mexhiti, përmes kësaj ftese të nivelit të lartë, konfirmoi një herë tjetër rëndësinë dhe ndikimin e tij si një lider që fuqizon marrëdhëniet ndërkombëtare të Maqedonisë së Veriut dhe rajonit.
Prania e Izet Mexhitit në këto ceremoni nuk ishte thjesht një nder personal, por një mundësi për të promovuar bashkëpunimin dhe miqësinë midis Maqedonisë së Veriut dhe Shteteve të Bashkuara.
Ky angazhim i Mexhitit dëshmon rëndësinë e lidershipit të tij dhe kontributin për të forcuar pozicionin e Maqedonisë së Veriut në arenën ndërkombëtare.
