Debërcë, 26 qershor Zhurnal.mk – Policia e Maqedonisë së Veriut ka ngritur kallëzim penal ndaj ish-kryetarit të Komunës së Debërcës, Z.N. (60), nën dyshimin se ka kryer veprën penale “Punë e pandërgjegjshme në detyrë”, duke i shkaktuar dëm financiar buxhetit të komunës.
Sipas njoftimit të policisë, i dyshuari, në cilësinë e kryetarit të Komunës së Debërcës, gjatë periudhës 2017–2025, nuk ka ushtruar mbikëqyrjen e detyrueshme dhe nuk ka ndërmarrë masat e nevojshme për shfrytëzimin e ligjshëm të një objekti afarist në pronësi të komunës, i vendosur në një parcelë kadastrale në fshatin Volinë.
Autoritetet thonë se, pa nënshkruar kontrata përkatëse, ai u ka mundësuar disa personave juridikë të ushtrojnë veprimtari tregtare në këtë objekt pa paguar kompensimin që duhej të derdhej në buxhetin komunal.
Si pasojë e këtij veprimi, sipas policisë, Komuna e Debërcës ka pësuar dëme financiare, ndërsa ndaj ish-kryetarit është ngritur kallëzim penal për shkak të dyshimeve për keqmenaxhim të detyrës zyrtare.
Rasti do të procedohet më tej nga organet kompetente, të cilat do të hetojnë përgjegjësinë e ish-zyrtarit komunal.
