Shkup, 2 nëntor – Qytetarët ankohen për kushtet johigjienike nëpër këndet e lojërave për fëmijë. Ata thonë se një pjesë të madhe kohës së lirë fëmijët e tyre i kalojnë atje dhe në shumtën e rasteve përballen me papastërti, erë te keqe dhe me pamje të pahijshme të këndeve të lojërave. Ata kërkojnë kujdes të shtuar si nga institucionet ashtu edhe nga qytetarët.
“Shumë keq, mendoj gjithkund është situatë e keqe higjienike. Duhet të ndërmarrin diçka, edhe ajri është i ndotur, vjen erë e keqe, pamja është shumë e keqe, fëmijët nuk mund t’i lësh të luajnë, gjithçka është e ndotur”, tha një qytetare.
“Kjo pjesë relativisht është mirë. Ndërsa në rrethinë nëpër lagje ka shumë të dëmtuara, kështu që nuk janë shumë higjienike. Kjo pjesë më pëlqen”, shtoi një qytetare.
“Mendoj se jo. Duhet të jenë më të pastra”, tha një qytetare tjetër.
“Janë higjienike, por jo mjaftueshëm. Fëmijët kalojnë një kohë të shumtë, kur kemi kohë të lirë”, u shpreh një qytetar.
“Aq sa i mirëmbajmë aq do të jenë higjienike. Në përgjithësi mendoj se janë mirë, ekziston hapësirë për përmirësim. Duhet ngadalë kulturën evropiane ta tërheqim tek ne, që të jemi më afër vendeve të zhvilluara, por përgjithësisht janë mirë. Kujdesi ndaj lojërave dhe mjeteve që përdorin fëmijët duhet të rritet”, tha një qytetar.
Punonjësit e higjienës komunale thonë se me aq sa kanë mundësi mundohen t’i mirëmbajnë këndet e lojërave.
“Pastrojmë gjithçka ne. Ne punojmë këtu, aq sa mundemi pastrojmë”, shtoi Punonjës i higjienës komunale..
Përveç këndeve të lojërave, edhe tualetet publike janë të braktisura nga kujdesi higjienik. Nga ajo që pamë nga afër, tualetet ishin të mbuluara nga rrjetet e merimangave dhe papastërti shumë e madhe.
