Shkup, 28 mars – Kanë kaluar gati dy javë nga tragjedia në Koçan dhe Kuvendi ende po i shtyn seancat e tij, përfshirë edhe seancën e pyetjeve parlamentare. Është e papranueshme dhe e papërgjegjshme që deputetët të mos mbajnë seanca në momentin e një tragjedie të tillë, kur qytetarët presin përgjigje, kur duhet analizuar sistemi dhe të miratohen hapat e ardhshëm që mund të ndërmarrë Kuvendi në kuadër të kompetencave të tij, thonë nga Komiteti i Helsinkit për të Drejtat e Njeriut.
Prandaj ata kujtojnë se funksioni legjislativ i Kuvendit është vetëm një nga funksionet themelore kushtetuese që ka. Kuvendi ka funksion përfaqësues dhe mbikëqyrës, dhe pyetjet parlamentare janë një nga format themelore të mbikëqyrjes mbi punën e Qeverisë dhe bartësve të tjerë të funksioneve publike.
Prandaj, është e pakuptueshme që Kuvendi, duke i pasur këto mekanizma në dispozicion, në vend që t’i përdorë, vendosi të mos mbajë seanca. Është logjike të shtrohet pyetja se cila është nevoja e ekzistimit të organit më të lartë përfaqësues të qytetarëve, kur përfaqësuesit e zgjedhur që e përbëjnë atë kanë vendosur të heshtin para qytetarëve që kanë zgjedhur në një kohë kur ata kanë më shumë nevojë për to”, thuhet në deklaratën e Komitetit të Helsinkit.
