Zëvendësministrja e Ekonomisë, Kulturës dhe Inovacionit, Olta Manjani adresoi në takimin inaugurues të Komitetit të Përbashkët Konsultativ me Komitetin Ekonomik dhe Social të BE, angazhimin për forcimin e dialogut dhe bashkëpunimin mes Shqipërisë dhe BE-së.
Duke marrë fjalën në këtë takim, që u çel sot në Tiranë me pjesëmarrjen e kryeministrit Edi Rama, Manjani tha se, takimi i sotëm vjen pas organizimit të disa veprimtarive të rëndësishme që janë zhvilluar në Tiranë, me fokus dialogun social në BE.
“Kemi patur dje takimin rajonal për rritjen e cilësisë së jetës përmes një dialogu social efikas me përfaqësues të Ballkanit Perëndimor, kemi takuar raportuesit përfaqësues teknik të institucioneve dhe grupeve për të drejtat themelore dhe të shtetit të së drejtës të Komitetit Europian për Ekonominë dhe Çështjet Sociale dhe sot kemi takimin e parë të Komitetit të Përbashkët Konsultativ me Komitetin Ekonomik dhe Social të BE, një hap i rëndësishëm në rrugën e integrimit europian të Shqipërisë”, theksoi Manjani.
Sipas saj, krijimi i këtij Komiteti është dakordësuar në bazë të Marrëveshjes së Stabilizim-Asocimit dhe synon të çojë më përpara dialogun social për krijimi i këtij komitetit.
Ajo bëri të ditur se, institucionet shqiptare dhe ekspertët kanë kryer përzgjedhjen për zgjedhjen e gjashtë vëzhguesve anëtarë të palës shqiptare në Komitetin e Përbashkët Konsultativ me Komitetin Ekonomik dhe Social të BE, në bashkëpunim me bizneset sindikatat dhe shoqërinë civile.
“Komiteti i Përbashkët Konsultativ i Shqipërisë është një reflektim i ngjajshëm i Komitetit Europian për Çështjet Ekonomike Sociale, ku përfaqësohen palë të ndryshme, me detyrën për të trajtuar çështje sociale për anëtarësimin në BE”, tha Manjani.
Manjani theksoi se, “ky komitet do të shërbejë si promovues i dialogut dhe bashkëpunimit mes partnerëve socialë dhe shoqërisë civile në BE dhe në Shqipëri”.
Gjithashtu, vuri në dukje ajo, “ky Komitet do të mbështesë përgatitjen e organizatave, shoqërisë civile, punonjësve për veprimtaritë në kuadrin e anëtarësimit në BE, për forcimin e dialogut social më tej”.
