Aksidenti që ndodhi sot në magjistralen Prishtinë – Ferizaj dyshohet se ishte i qëllimshëm dhe i parapriu një konflikt verbal në mes të dy palëve të përfshira. Një 24-vjeçar po dyshohet se e goditi veturën ku ndodheshin dy persona, si pasojë e një mosmarrëveshje, raporton Gazeta Sinjali.
Siç mëson Sinjali, gjithçka kishte nisur në afërsi të një banke që ndodhet në atë pjesë, ku i dyshuari ishte takuar me viktimën, një vajzë 25-vjeçare, me të cilën kanë pasur lidhje dashurie në të kaluarën.
Në bazë të informacioneve të para, biseda mes tyre ishte e tensionuar, çka e shtyri viktimën që të largohej prej aty, bashkë me vëllain.
Të njëjtat burime kanë bërë me dije se pasi vajza vazhdoi rrugën e saj, i dyshuari e ka ndjekur nga pas me veturën e tij dhe në një moment e ka goditur, duke tentuar që ta ndalojë.
Veturat u ndeshën dhe për pasojë viktimat pësuan lëndime trupore, e gjithashtu u shkaktuan edhe dëme materiale.
Policia ka ndërmarrë veprimet e nevojshme, me ç’rast është siguruar edhe prezenca e të dyshuarit, i cili ka dhënë deklaratën e tij për rastin.
Me urdhër të Prokurorit të Shtetit është iniciuar hetim në drejtim të veprës penale “Vrasje në tentativë”.
