Disa faqe interneti që ofronin Nintendo Switch 2 në shitje paraprake u rrëzuan nga ngarkesa e madhe e fansave që dëshironin të porosisnin konsolën e re të Nintendos.
Shitja paraprake e Nintendo Switch 2 ka nisur zyrtarisht në Amerikën e Veriut. Pas një vonese fillestare, Nintendo më në fund e bëri të mundur që Switch 2 të porositet paraprakisht në SHBA dhe Kanada që nga 24 prilli.
Konzola do të jetë e disponueshme në shitje të lirë duke filluar nga 5 qershori, kur do të mund të blihet edhe në shumë tregje të tjera. Ata që ishin regjistruar paraprakisht në faqen zyrtare të Nintendos morën një email me ftesë për të bërë porosinë. Përveç vetë Nintendos, edhe dyqane të tjera online filluan shitjen paraprake të Switch 2, përfshirë GameStop, Walmart, Best Buy, Target dhe të tjerë.
Nintendo Switch 2 shitet me çmimin 450 dollarë, ndërsa paketa që përfshin edhe lojën Mario Kart World kushton 500 dollarë. Menjëherë pas hapjes së porosive paraprake, shumica e rrjeteve të shitjes me pakicë mbetën pa stok, pasi Switch 2 u shit shumë shpejt.
Pritet që e njëjta situatë të ndodhë edhe më 5 qershor, kur konzola të dalë në shitje të hapur. Ka zëra që Nintendo planifikon të shtojë prodhimin e Switch 2 në Vietnam, për t’u përgatitur për kërkesën e lartë dhe për të siguruar shpërndarje në kohë për fansat.
Sipas të dhënave të Nintendos, vetëm në Japoni janë regjistruar 2,2 milionë njerëz për parapagim, dhe jo të gjithë do të mund ta marrin konzolën menjëherë, pasi ky numër është shumë më i madh sesa sasia që pritet të dërgohet në atë rajon ditën e lëshimit të Switch 2.
