Kosovar Alija, historian me formim akademik dhe përvojë në fushën e studimeve historike, garon për Asamblenë Komunale në Gjakovë, nga Partia Shqiptare Demokristiane, me numrin 2 në listë. Ai vjen nga Dushkaja dhe e identifikon veten si demokristian të përkushtuar ndaj vlerave familjare, besimit dhe ndershmërisë.
Alija ka theksuar se kandidimi i tij është i motivuar nga bindja se ndryshimi i vërtetë fillon në nivelin lokal. Synimi i tij është të përfaqësojë qytetarët me transparencë e përkushtim, duke u fokusuar në shërbimet publike, infrastrukturën, arsimin, mbrojtjen e mjedisit dhe zhvillimin ekonomik.
Në prioritetet e tij përfshihet përmirësimi i rrugëve, ndriçimit dhe pastërtisë, si dhe mbështetja për të rinjtë, të moshuarit dhe familjet në nevojë. “Komuna duhet të jetë shtëpi e përbashkët, ku secili qytetar ndjehet i respektuar dhe i përfshirë,” ka theksuar ai.
Mes problemet më urgjente që identifikon janë mungesa e infrastrukturës së rregullt, ndriçimi i dobët në fshatra, kanalizimet jo adekuate, mungesa e hapësirave të gjelbra dhe shërbimet e pamjaftueshme sociale për komunitetin më të ndjeshëm.
Kosovar Alija ka edhe përvojë të mëparshme politike, duke shërbyer për katër vite si drejtor i Administratës në Komunën e Gjakovës, ku ka kontribuar në përmirësimin e shërbimeve dhe organizimit administrativ.
Ai shprehet i gatshëm për bashkëpunim të hapur me kryetarin e ardhshëm dhe asamblenë, duke e parë dialogun dhe transparencën si kyçe për rezultate të qëndrueshme.
Mesazhi i tij për qytetarët është i qartë: “Forca e një shoqërie qëndron te bashkëpunimi dhe përgjegjshmëria individuale. Ndryshimi nis nga secili prej nesh, nga një veprim i vogël. Me besimin tuaj, unë do të jem këtu për t’ju shërbyer sot dhe nesër.”
