Numri i të vdekurve nga shembja e një shkolle me konvikt në Indonezi është rritur në 45, konfirmuan punonjësit e shpëtimit këtë të diel, ndërsa operacionet për gjetjen e të mbijetuarve vazhdojnë.
Deri më tani, 104 persona janë shpëtuar nga rrënojat, ndërsa të paktën 26 të tjerë konsiderohen të zhdukur.
Më herët gjatë ditës, autoritetet kishin raportuar 37 të vdekur, por shifrat janë rritur pas nxjerrjes së trupave të tjerë nga rrënojat.
Ngjarja ndodhi të hënën në një shkollë islame shumëkatëshe me konvikt, e vendosur në Sinduarjo, pranë qytetit të madh të Surabayas, në pjesën lindore të ishullit. Ndërtesa u shemb papritur në momentin kur nxënësit ishin mbledhur për lutjet e pasdites.
Operacionet e kërkim-shpëtimit pritet të zgjasin për rreth një javë, siç është praktikë e zakonshme në Indonezi. Megjithatë, autoritetet kanë deklaruar se misioni do të zgjasë më shumë nëse ka indikacione për gjetjen e viktimave të tjera.
