Me rastin e 17 vjetorit të Pavarësisë së Republikës së Kosovës, në sheshin “Xhorxh Bush” të Prishtinës parakaluan Forca Sigurisë së Kosovës dhe Policia e Kosovës,
Presidentja e vendit, Vjosa Osmani theksoi forcën dhe guximin e popullit të Kosovës, i cili luftoi për liri dhe sakrifikoi për të ardhmen.
Ajo vlerësoi Forcën e Sigurisë së Kosovës (FSK) si krenarinë e shtetit dhe theksoi se mbrojtja e lirisë është një detyrë e përhershme.
“Ne jemi republika e Kosovës, ne jemi zëri i rezistencës dhe guximit dhe nuk është thyer asnjëherë. Ne jemi populli që luftuam për liri dhe sakrifikuam të ardhmen, ne jemi vizioni që riformojë shtetit jemi Republika që nuk ndalet kurrë. Para nesh do të dalë ushtria jonë trashëgimtarja dhe pasuesja e denjë e Ushtrisë Çlirimtare e Kosovës. FSK ka treguar se është krenaria e shtetit dhe e gatshme për ta mbrojtur integritetin dhe sovranitetin e Kosovës. Liria jonë është e shenjtë dhe mbrojtja e saj është detyra e përhershme. Kosova është shenjë e dinjitetit kushdo që guxon të vë në dyshim le ta dëgjoj sot që Kosova ecën përpara me vizionin e krenarisë së saj. Kosova është atdheu ku projektojmë ëndrrat dhe me besim të pa lëkundur të vendit tonë”, ka thënë Osmani.
Kryeministri i Kosovës, Albin Kurti, gjatë fjalës së tij për 17-vjetorin e Pavarësisë, theksoi se krijimi i shtetit të Kosovës është një nga ngjarjet më të fuqishme në historinë moderne të Evropës.
Ai nderoi ata që sakrifikuan për lirinë e vendit, duke theksuar se Kosova është ndërtuar mbi gjakun e dëshmorëve dhe martirëve.
“Në këtë sheshin ‘Xhorxh Bush’ jemi mbledhur më 17 shkurt për ta shënuar 17 vjetorin, para nesh janë rreshtuar për të marshuar ushtria jonë dhe policia. Pas nesh shtrihet e kaluara jonë e rezistencës për të arritur te krijimi i shtetit të Kosovës. Në historinë moderne të Evropës krijimi i shtetit të Kosovës është një nga historitë më të fuqishme. Republika e Kosovës është shteti më i ri në kontinentin më të vjetër. Teksa po shënojmë 17 shkurtin po kujtojmë të gjithë ata që sakrifikuan dhe kontribuuan për vendin. Republika e Kosovës është rezultat i gjithë atyre që u përpoqën për këtë vend. Republika e Kosovës është rezultat i aktit sipëror të brezit të ri, andaj sot kur po e festojmë 17 vjetorin e pavarësisë të gjithë dëshmoret dhe martirët janë mes nesh sepse vendi është ndërtuar pikërisht mbi gjakun e tyre. Republika e Kosovës është e shqiptarëve, por edhe e pakicave sepse vullneti i shumicës kompletohet me të drejtat e të gjithave pakicave. Të gjithë sytë tanë janë drejtuar drejt jush ushtarë e policë, ne i marrim ndjenjat e lavdisë dhe sigurisë. Nuk ka vend që ka vuajtur më shume për armë dhe municione sesa Ushtria Çlirimtare e Kosovës. Në katër vitet e fundit Kosova ka investuar qindra miliona euro në municione, kemi blerë mijëra pushkë e miliona municione dhe kemi bërë ngritjen e industrisë ushtarake”, ka thënë Kurti.
