Shkup, 24 mars – Krisja e raporteve mes BE-së dhe ShBA-së, duhet t’i forcojë lidhjet midis shteteve të kontinentit Evropian dhe kjo situatë duhet të ndikojë pozitivisht në përshpejtimin e agjendës së zgjerimit të BE-së, thotë për TVM2 profesori universitar Murat Aliu, por shton se BE-ja nuk jep sinjale të tilla për momentin pasi nuk ka kohë të merret me anëtarësime të reja pas një çarje kaq thellë radikale.
“Shpërfillja e SHBA-së ndaj BE-së, në një aspekt e konsolidon dhe kjo është një rrjedhë logjike, e natyrshme. BE-ja, në këtë mënyrë i forcon lidhjet brenda vendeve të saja dhe në rrjedha logjike duhet të kishte ndodhur një gjë e tillë, pra përshpejtimi i BE-së për të përfshirë Maqedoninë në strukturat e saja. Nga ana tjetër nuk duket edhe ashtu, pasi një konglomerat shtetesh si BE-ja, kur kanë probleme të natyrave të këtilla shumë serioze, me një thyerje apo çarje shumë radikale, nuk e di nëse do të ketë kohë të merret me çështjen e zgjerimit, apo pranimit të anëtareve të reja në BE. Për momentin nuk ka sinjale të tilla që pas kësaj çarje do të përshpejtohet ky proces.”, u shpreh për TVM2 profesori universitar Murat Aliu.
Sipas Aliut, problemi nuk qëndron vetëm te BE-ja, por edhe te vendet që aspirojnë të bëhen pjesë e saj. Në këtë rast, Maqedonia e Veriut nuk po ndjek një kurs të ashpër dhe insistues për integrim në BE-në.
“Qeveria e re apo më mirë thënë kryeministri Mickovski, duket qartazi që më shumë ndjek një linjë pro-amerikane sesa pro-evropiane, shtoja këtu edhe kushtin që akoma e kemi për ndryshimet kushtetuese, dhe në këtë drejtim nuk kemi thuaja se asnjë lëvizje përpara. Nuk mund të thuhet që Maqedonia e Veriut, është më afër apo më larg integrimit të BE-së, sesa para gjashtë muajsh apo një viti.”, tha Aliu.
Sipas Aliut, procesi i integrimit nuk kërkon ndryshime vetëm në çështjet politike, por duhet të plotësohen edhe disa kritere juridike dhe ekonomike brenda vendit, lëvizje të tilla pozitive në këto drejtime nuk janë të dukshme për momentin, prandaj procesi i anëtarësimit që deri tani ka qenë i ngadalshëm, aktualisht ka ngecur, konsideron profesori universitar Murat Aliu.
