Gjykata e Posaçme e Shkallës së Parë Kundër Korrupsionit dhe Krimit të Organizuar rrëzoi sot kërkesën e deputetes së Partisë së Lirisë, Monika Kryemadhi për revokimin e masës së sigurisë “detyrim paraqitje” të caktuar ndaj saj.
Deputetja Monika Kryemadhi, akuzohet nga SPAK për tri vepra penale: “Pastrimi i produkteve të veprës penale ose veprimtarisë kriminale”, “Korrupsion pasiv i funksionarëve të lartë shtetërorë ose të zgjedhurve vendorë”, “Refuzim për deklarim, mosdeklarimi, fshehja dhe deklarimi i rremë i pasurive, interesave private të personave të zgjedhur dhe nëpunësve publikë”.
Sipas vendimit të GJKKO, në përfundim të seancës së sotme gjyqtari Erjon Çela, vendosi mospranimin e kërkesës së Kryemadhit.
Kryemadhi paraqiti më 2 prill pranë GJKKO kërkesën me objekt: “Revokim i masës së sigurimit”.
GJKKO sqaron se kundër këtij vendimi mund të bëhet ankim në Gjykatën e Posaçme të Apelit për Korrupsionin dhe Krimin e Organizuar, brenda 5 ditëve, afat i cili fillon nga dita e njoftimit të vendimit të gjykatës.
Kështu, Kryemadhi si person nën hetim do të vijojë të paraqitet në Zyrat e Policisë
Gjyqësore, të Prokurorisë së Posaçme kundër Korrupsionit dhe Krimit të
Organizuar të hënën e parë të çdo muaji në orën 12.00.
