Kryeministri në detyrë, Albin Kurti, ka konfirmuar përkrahjen për komunitetin rom, dhe angazhimin për të rritur mundësitë për shkollim e arsimim, punësim e shëndetësi dhe mirëqenie.
Një shoqëri më e barabartë sipas Kurtit është një shoqëri që krahas përfitimeve, i shton edhe mundësitë për të kontribuar, gjë që rezulton në mirëqenie dhe zhvillim.
“Data 8 prill është një datë krenarie për komunitetin rom. Gëzohem që jam këtu për të festuar bashkë me juve. Jam i lumtur që të konfirmoj nga këtu, në mesin tuaj, përkrahjen e qeverisë sonë dhe timen, ndaj komunitetit tuaj, që ka një trashëgimi të vjetër në shoqërinë tonë dhe kontribut të çmuar për shtetin tonë”, ka thënë Kurti të enjten mbrëma në Prizren në ngjarjen e organizuar për nder të 8 Prillit, Ditës së Romëve.
Ai ka theksuar angazhimin e përbashkët me pjesëtarë e përfaqësues të komunitetit rom për progres në disa fusha.
Ka përmendur bursat e ndara për nxënës dhe studentë të komuniteteve jo shumicë, përfshirë atyre rom, pastaj mbështetjen për qendrat mësimore për fëmijë, sikurse edhe themelimin e Grupit Ndërinstitucional për Promovimin e Punësimit të Romëve, Ashkalive dhe Egjiptianëve, dhe miratimin e Rregullores për Pranim në Shërbimin Civil për të mundësuar shpalljen e vendeve të punës për anëtarët e komuniteteve jo shumicë, në rast se një institucion nuk e ka plotësuar kuotën ligjore prej 10% për komunitetet jo shumicë.
Në të njëjtën kohë, sipas njoftimit të ZKM-së, ka ritheksuar përkushtimin për mbrojtjen dhe promovimin e të drejtave të komunitetit rom.
“Ne angazhohemi çdo ditë për bashkëpunim edhe më të thellë për realizimin e synimeve të përbashkëta – për më shumë barazi dhe më shumë mirëqenie”, është shprehur Kurti, duke uruar Ditën e Romëve.
