Komuna e Vitisë ka reaguar me një sqarim publik lidhur me projektet që po realizohen nëpër shkollat e saj në kuadër të Fondit të Kosovës për Efiçencë të Energjisë (FKEE), duke theksuar se këto investime janë rezultat i marrëveshjeve mes komunës dhe këtij fondi.
Sipas njoftimit zyrtar, financimi po bëhet përmes një skeme kthimi, ku Komuna e Vitisë mbulon tërësisht investimet në baza pa interes dhe me një afat të gjatë kthimi.
Ashtu siç njofton komuna, marrëveshjet janë specifike për secilën shkollë ku po zbatohet projekti, përfshirë SH.M.U “Nijazi Rexhepi” në Sllatinë të Epërme, “Mirali Sejdiu” në Gërmovë, paralelen në Buzovik dhe shkollën “28 Nëntori” në Sadovinë e Jerlive.
Në një ton kritik, komuna ka shprehur keqardhje për mënyrën se si Zyra e Kryeministrit po viziton këto projekte pa njoftim paraprak dhe pa koordinim me nivelin lokal.
Autoritetet lokale e kanë quajtur këtë praktikë joinstitucionale dhe i kanë bërë thirrje ekzekutivit që të ndryshojë qasjen në raport me nivelin lokal.
Megjithë kritikat, Komuna e Vitisë rithekson përkushtimin e saj për të vazhduar bashkëpunimin me FKEE dhe për të realizuar projekte që përmirësojnë kushtet në arsim dhe kontribuojnë në kursimin e energjisë.
Sipas komunës, këto investime janë thelbësore për të siguruar një mjedis më të qëndrueshëm dhe efikas për gjeneratat e ardhshme.
Ndryshe, Kurti gjatë ditës së djeshme vizitoi edhe Komunën e Gjilanit me crast së bashku me kryetarin Hyseni dhe zëvendësministrin e Ministrisë së Mjedisit dhe Planifikimit Hapësinor, Jeton Raka, kanë vendosur gurëthemelin për banim të përballueshëm dhe social.
Me këtë rast, kryeministri Kurti bëri të ditur se Komuna e Gjilanit është njëra ndër pesë komunat për të cilat janë hartuar projektet ideore dhe kryesore për banimin e përballueshëm dhe social.
“Qysh në fillim të mandatit patëm filluar me përgatitjet për banimin e përballueshëm social për komunat dhe këtu në Gjilan po e kurorëzojmë themelin,” deklaroi Kurti.
