Shkup, 02 korrik, Zhurnal.mk – Alarmojmë për një situatë jashtëzakonisht serioze, e cila paraqet kërcënim të drejtpërdrejtë për shëndetin dhe sigurinë e pacientëve dhe personelit mjekësor.
Pas motit të keq në Shkup, është përmbytur Klinika e Onkologjisë, janë fikur aparatet për radioterapi.
Ka depërtuar ujë edhe në hapësirat ku jepet terapia me jod radioaktiv.
Nuk bëhet fjalë për ujë të zakonshëm të shiut, por për ujë të dalë nga kanalizimi!, deklaroi sot zëdhënësja e LSDM‑së, Bogdanka Kuzeska. Kjo do të thotë se kategoria më e ndjeshme e pacientëve është e ekspozuar ndaj një rreziku të dyfishtë, të frikshëm.
Rrezik radiacioni, për shkak të depërtimit të ujit në hapësirën ku jepet terapia me jod radioaktiv.
Dhe rrezik biologjik nga depërtimi i ujit fekal, septik, nëpër klinikë.
Informacionet që disponojmë tregojnë se i vetmi bunker i izoluar me mure plumbi është përmbytur plotësisht, ndërsa një hapësirë tjetër alternative e tillë në Klinikë – nuk ka.
Duke pasur parasysh se jodi radioaktiv ka gjysmë‑jetë rreth 8 ditë, publikisht pyesim dhe kërkojmë përgjigje të menjëhershme nga menaxhmenti i Klinikës së Onkologjisë dhe nga Drejtoria për Mbrojtje nga Rrezatimi:
A është reaguar me kohë në këtë situatë krize apo është lejuar kaosi të rrezikojë jetët e njerëzve?
Ku janë fizikisht të vendosur në këtë moment pacientët që tashmë kanë marrë terapi me jod?
Nëse i vetmi bunker i sigurt është përmbytur, a ndodhen këta pacientë mes njerëzve të tjerë?
A ekziston kontaminim me jod radioaktiv jashtë zonave të parashikuara?
A është kryer dekontaminim urgjent dhe i plotë i hapësirave ku kanë qëndruar këta pacientë pas përmbytjes?
Së fundi, a është rrezikuar siguria e të gjithë personelit dhe e qindra pacientëve që sot kalojnë nëpër korridoret e Klinikës?
Kush do të mbajë përgjegjësi për kontaminimin e mundshëm biologjik të shkaktuar nga derdhja e ujërave fekale në një institucion spitalor ku trajtohen pacientë imunokomprometuar?
Shëndeti i pacientëve dhe siguria e punonjësve shëndetësorë nuk duhet të lihen në mëshirën e infrastrukturës së vjetëruar dhe paaftësisë.
Kërkojmë përgjigje të menjëhershme, të sakta dhe transparente, si dhe marrjen e përgjegjësisë së menjëhershme për këtë katastrofë, shtoi Kuzeska.
