Kryetarja e Kuvendit, Elisa Spiropali nënshkroi sot marrëveshjen e mirëkuptimit ndërmjet Kuvendit të Shqipërisë dhe Fondacionit Shqiptaro-Amerikan për Zhvillim për zbatimin e Programit të lidershipit “LEAD Albania”.
Përmes kësaj marrëveshjeje Kuvendi do të bëhet pjesë e institucioneve të cilët zbatojnë programin “LEAD Albania”, duke u mundësuar profesionistëve të rinj dhe të talentuar shqiptarë përvojë të drejtpërdrejtë në proceset vendimmarrëse në Kuvend, përmes angazhimit 1-vjeçar të përfituesve në pozicionin e këshilltarit në kabinetin e Kryetarit.
Programi për Zhvillimin e Lidershipit, i cili zbatohet prej vitit 2013 nga AADF, është konceptuar bazuar në Programin e Shtëpisë së Bardhë për Lidershipin (White House Fellows Program) në Shtetet e Bashkuara të Amerikës.
Qëllimi i Programit në Shqipëri është që t’u sigurojë profesionistëve të rinj dhe të talentuar shqiptarë përvoja të drejtpërdrejta në proceset vendimmarrëse, shoqëruar nga një ndjesi e përfshirjes personale në lidershipin e shoqërisë.
Programi zbatohet në disa institucione të larta si Presidenca, Kryeministria, Ministritë, dhe organet qeverisëse të sistemit të drejtësisë dhe vendosja në institucione kryhet sipas interesit individual dhe përshtatshmërisë profesionale të aplikantëve.
