Shkup, 31 mars – Lidhja e Sindikatave të Maqedonisë të mërkurën do të mbajë seancë publike të organeve dhe trupave në kuadër të LSM-së e cila do të fillojë para Shtëpisë së punëtorëve në orën 12:05. Të pranishmit do të vazhdojnë drejt Kuvendit, Odës ekonomike dhe Qeverisë ku do të vazhdojë seanca nga ku do të dërgohen porosi: “Nuk mund të ketë për deputetët dhe të mos ketë për punëtorët!”, “Dora e shtrirë e punëtorit sot, mund të bëhet lehtësisht një grusht i shtrënguar nesër!” dhe “Nuk mund të vendoset për ne, pa ne!”.
Siç informojnë sot nga LSM-ja, seanca publike është pas vendimit të Kryesisë së LSM-së nga 28 marsi i këtij viti me qëllim të shprehjes së opinionit publik për realizimin e interesave sociale dhe ekonomike për mbrojtjen e të drejtave të punëtorëve dhe të drejtën e lirisë së asociimit dhe organizimit sindikal.
“Deputetët në Kuvend të zgjedhur nga punëtorët të propozojnë dhe votojnë propozimin e LSM-së për rritje shtesë të pagës minimale për 6.000 denarë, si dhe rritje të të gjitha pagave tjera në sektorin privat me rritjen e pagës minimale. Të mos votojnë ligje që ulin të drejtat e punëtorëve në dëm të punëtorëve, ashtu siç nuk duhet të votojnë ligje për uljen e privilegjeve të tyre”, thuhet në kumtesë.
Sipas LSM-së, shefat e Odës ekonomike ta pranojnë dorën e shtruar të punëtorëve për rritjen e pagave për të mbajtur punëtorët e kualifikuar në vend sepse, siç thonë, “së paku 15.000 punëtorë dhe qytetarë e braktisin Maqedoninë çdo vit, kështu që nëse nuk rriten pagat, ata do të jenë fajtori kryesor për eksodin e punëtorëve nga Maqedonia”.
“Qeveria të rreshtohet në anën e punëtorëve, të ndalojë marrjen e vendimeve të njëanshme në dëm të punëtorëve, të respektojë dialogun social dhe të ndalojë sulmet ndaj sindikatave dhe përpjekjet për të heshtur punëtorët. Qeveria, si punëdhënësi më i madh, duhet të rrisë pagat e punonjësve të sektorit publik konform me Kontratën e përgjithshme kolektive për sektorin publik, kontratat kolektive sektoriale, kontratat kolektive në nivel të punëdhënësit dhe t’i përafroj ato me pagën minimale konform me ligjet e veçanta”, thuhet në komunikatën e LSM-së.
