Shkup, 29 qershor Zhurnal.mk – Në prag të rikonstruktimit të Qeverisë së Maqedonisë së Veriut, Ivan Stoilkoviq pritet të largohet nga posti i zëvendëskryeministrit dhe ministrit për Marrëdhënie Ndërmjet Bashkësive, duke i dhënë fund mandatit të tij në këtë dikaster.
Sipas informacioneve të publikuara nga Agjencia e Lajmeve INA, ministria që ai drejtoi pritet t’i kalojë një kuadri të koalicionit VLEN në kuadër të ndryshimeve qeveritare.
Pak para largimit, Stoilkoviq publikoi një raport mbi punën e tij, ku vlerësoi se gjatë mandatit kishte ulur shpenzimet, kishte racionalizuar funksionimin e ministrisë dhe i kishte dhënë fund praktikës së, siç e quajti ai, “pagave pa punë”.
Megjithatë, mandati i tij u shoqërua me kritika të vazhdueshme nga partitë politike shqiptare, të cilat e akuzuan për largimin e punonjësve shqiptarë nga ministria, trajtim diskriminues dhe shkelje të parimit të përfaqësimit të drejtë dhe adekuat.
Stoilkoviq u kritikua edhe për qëndrimet e tij publike, të cilat shpesh u cilësuan si të afërta me politikat zyrtare të Serbisë, si dhe për deklaratat e tij lidhur me çështje rajonale, të cilat shkaktuan reagime të shumta në opinionin publik dhe në skenën politike të vendit.
Me rikonstruktimin e paralajmëruar të Qeverisë, Ministria për Marrëdhënie Ndërmjet Bashkësive pritet të drejtohet nga një përfaqësues i koalicionit VLEN, duke mbyllur kështu mandatin e një prej ministrave më të kontestuar në raport me partitë dhe opinionin shqiptar.
