Akademiku Apollon Baçe e ka cilësuar ish-kryeministrin Sali Berisha si një person me memorie të fortë dhe intelektual.
Në një rrëfim për “Quo Vadis” të moderatores Pranvera Borakaj në Vizion Plus, Baçe tha se Berisha është një njeri intelektual që e do vendin dhe Kosovën, megjithatë edhe ai ka disa gabime.
Sipas tij një nga gabimet e Berishës është se ka mbajtur pranë vetes këshilltarë të gabuar, ku një ndër ta evidentoi të ndjerin Gramoz Pashko.
Baçe tha se edhe pse për Pashkon thonë fjalë të mira, ai është personi përgjegjës për shkatërrimin e ekonomisë, pasi me urdhër të tij u shkatërruan uzinat dhe fabrikat, që sot mund ta mbanin Shqipërinë në nivele të larta në industrinë e prodhimit.
Pjesë nga biseda:
Baçe: Ka një memori të jashtëzakonshme. Ka një gjë pozitive, ka lexuar mjaft, mund ta fus te intelektualët. Ka dhe atë që e do vendin, e do dhe Kosovën, por është pak pragmatist.
Borakaj: Por është shumë pragmatist.
Baçe: Për mua ka pas këshilltarë të këqinj. Për mua Gramoz Pashko është njeri që ka sjellë dëme.
Borakaj: Pse?
Baçe: Me atë çekun e bardhë. Ne i shkatërruam të gjitha, Uzina e Traktorëve ajo ishte llogaritur të bënte avionë reaktivë. Kombinati i Tekstilit në Berat, Kombinati i Konservave në Vlorë. Unë se kuptoj pse duhej. Ky ka qenë iniciatori i kësaj, Gramozi. Me ato pseudoekonomi neoliberale, që për mua është më mizerablja që ekziston në botë. Dëmi që ka sjellë Gramozi është i pafund.
