Marrëveshja mes Shqipërisë dhe Italisë për emigrantët e paligjshëm është diskutuar nga kryeministrja italiane Giorgia Meloni në një takim në Bruksel me dhjetë shtete anëtare të Bashkimit Europian.
Diskutimi i tyre u fokusua në konceptin “vend të tretë të sigurt” përpara zbatimit të rregullave sipas Marrëveshjes së re për Migracionin dhe Azilin dhe në bashkëpunimin me UNHCR-në dhe IOM-in në lidhje me kthimet vullnetare të asistuara, si dhe në ” qendrat e kthimit’, shkruan A2.
Meloni prezantoi marrëveshjen Itali-Shqipëri, një ditë pas mbërritjes së emigrantëve të parë të parregullt në portin e Shëngjinit, duke nënvizuar rolin e saj në luftën kundër trafikantëve të qenieve njerëzore.
Duke folur me gazetarët pas samitit, presidentja e Komisionit Evropian, Ursula von der Leyen , tha se udhëheqësit e BE-së kishin diskutuar idenë e “zhvillimit të qendrave të kthimit jashtë Bashkimit Evropian” për njerëzit pa të drejtë qëndrimi, raporton A2.
Von der Leyen theksoi gjithashtu se BE-ja duhet të mësojë nga marrëveshja e kryeministres italian Giorgia Meloni me Shqipërinë, një vend kandidat për në BE që po pret dy qendra azili për të përpunuar të dhënat e emigrantëve që përpiqen të arrijnë në Itali.
Por ndërkohë pas samitit të BE-së, Franca dhe Spanja janë shprehur kundër kësaj marrëveshjeje. Edhe pse fillimisht u pa si një model që mund të adaptohej nga vende të tjera të BE, për Francën dhe Spanjën modeli i Shqipërisë nuk i zgjidh problemet me emigrantët, por i krijon ato. Macron tha se i vetmi model që funksionon për emigrantët është ai evropian. Sipas tij vendet e BE nuk mund të veprojnë në mënyrë të izoluar.
