Shkup, 11 dhjetor – Në Kuvendin e Republikës së Maqedonisë së Veriut është mbajtur mbledhja konstitutive e Grupit Parlamentar Ndërpartiak për Mbrojtjen e Natyrës dhe Luftën kundër Ndotjes dhe Ndryshimeve Klimatike.
Pjesëmarrësit shprehën mbështetjen e tyre për themelimin e Grupit Parlamentar Ndërpartiak me sigurinë se do të kontribuojë në përmirësimin e mjedisit jetësor dhe përballimin me sukses të pasojave të ndryshimeve klimatike.
U theksua se shumica e komunave prej shumë vitesh përballen me problemin e ndotjes së ajrit dhe është problem që i kapërcen ngjyrat partiake, sepse të gjithë qytetarët i ndiejnë pasojat negative të ajrit të ndotur. Vëmendje më e madhe duhet t’i kushtohet edhe ndotjes së natyrës, përkatësisht ndotjes në qytetet dhe mjediset rurale që ndikon negativisht në zhvillimin e turizmit. Republika e Maqedonisë është vend i vogël, me industri jo shumë të zhvilluar dhe nuk ka ndikim të madh në klimën globale. Megjithatë, si vend nënshkrues i Marrëveshjes së Parisit për ndryshimet klimatike, duhet të marrë masa aktive për të reduktuar ndotjen dhe për të përmirësuar mjedisin jetësor. Republika e Maqedonisë, si palë kontraktuese e Komunitetit Energjetik, e zbaton legjislacionin e nevojshëm evropian në drejtim të shfrytëzimit më të madh të burimeve të rinovueshme të energjisë dhe zvogëlimit të emisioneve të gazrave serrë.
Është prezantuar puna e grupit joformal të gjelbër në përbërjen e kaluar parlamentare, i cili është formuar si iniciativë e sektorit civil. Ndër aktivitetet e tjera, grupi vizitoi Parkun Kombëtar të Mavrovës, u mbajt takimi koordinues në lidhje me Ligjin për shpalljen e Moçalit të Studençishtës monument natyror, për Ligjin për veprimin klimatik i cili ende nuk është miratuar, për ligjet që mbulojnë pjesë të caktuara të urbanizmit, ndërtimtarisë. Gjithashtu, janë parashtruar amendamente në propozim-buxhetet në pjesën për mjedisin jetësor dhe në pjesën për harmonizimin e Ligjit për kundërvajtje.
U shpreh mendimi se problemi i ndryshimeve klimatike shpesh neglizhohet nga politikëbërësit në vend. Në periudhën e kaluar u themelua Fondi i Gjelbër Klimatik, i cili ka 12 miliardë euro për financimin e projekteve për të luftuar ndryshimet klimatike. Fondi për Inovacione dhe Zhvillim Teknologjik është në fazën e akreditimit për t’u bërë institucion i akredituar për shfrytëzimin e mjeteve nga Fondi i Gjelbër Klimatik, ku Republika e Maqedonisë së Veriut është vendi i parë nga vendet e Ballkanit Perëndimor që përdor mjetet e këtij fondi.
U shpreh besimi se, si në përbërjen e kaluar parlamentare, bashkëpunimi i suksesshëm me përfaqësuesit e organizatave joqeveritare do të vazhdojë edhe në të ardhmen, gjë që do të kontribuojë në përmirësimin e rregullave ligjore dhe ndjekjen e politikave të zbatuara nga pushteti ekzekutiv. Ka bashkëpunim me grupet joformale të gjelbra në parlamentet e tjera të vendeve të Ballkanit Perëndimor dhe duhet të vazhdojë dhe zgjerohet në të ardhmen.
