Kryetari i Partisë Demokratike Sali Berisha iu bëri thirrje të rinjve dhe fëmijëve që të bojkotojnë mësimin në shenjë proteste kundër vendimit të qeverisë për të mbyllur platformën sociale TikTok.
Nga selia blu, gjatë një konference me gazetarët Berisha tha se “protesta e nxënësve, studentëve dhe të rinjve para kryeministrisë me datën 15 do të jetë protesta më e bukur, më madhështore që ka parë Shqipëria gjer sot”.
“Protesta me të cilën çdo fëmijë i çdo moshe, që ka smartfonin, përballet, del, bëhet luftëtar kundër diktaturës në mbrojtje të TikTok-ut dhe kundër censurës. Unë u them këtyre të rinjve se aty ku fillon censura, fillon diktatura”, tha Berisha.
Berisha po ashtu u bëri thirrje fëmijëve që të bojkotojnë mësimin.
“Kam një thirrje tjetër, të fillojë bojkoti i mësimeve. Të dashur fëmijë, të dashur të rinj dhe të reja, ai që u vë censurën, ai shkelmon mbi të ardhmen tuaj. Që ditën e hënë, për shembull, orën e parë do të ishte gjë madhështore që të mungoni sa më shumë”, tha Berisha.
“Prindërit të mos i dërgojnë ditën e hënë fëmijët e tyre në shkollë, të paktën orën e parë si një akt i betejës së fëmijëve tuaj për lirinë e shprehjes dhe kundër censurës”, tha Berisha.
“Dhe ju garantoj që nuk do guxojë shkollë apo mësues të marrë masa ndaj jush, se do përballet me pasojat më të rrepta ligjore. E drejta e grevës është e drejtë kushtetuese”, u shpreh Berisha.
