Shkup, 25 shkurt – Ambasadori i Shqipërisë në Maqedoninë e Veriut, Denion Meidani, së bashku me Ambasadorin e Zvicrës, Christoph Sommer, organizuan në Innox Center një takim prezantues dhe joformal me përfaqësues të organizatave të shoqërisë civile, OJQ-ve dhe mediave.
Takimi u zhvillua në një format të hapur diskutimi, ku u trajtuan tema që lidhen me procesin e integrimit në Bashkimin Evropian, rolin e shoqërisë civile në forcimin e demokracisë, si dhe rëndësinë e mediave të përgjegjshme në funksion të transparencës dhe llogaridhënies.
Në diskutime u theksua se qeverisja e mirë, dialogu social dhe përfshirja aktive e aktorëve joqeveritarë mbeten elemente kyçe për ndërtimin e një shoqërie demokratike dhe të qëndrueshme.
Pjesëmarrësit ndanë pikëpamje mbi sfidat aktuale dhe nevojën për bashkëpunim më të ngushtë mes institucioneve, partnerëve ndërkombëtarë dhe sektorit civil.
Vëmendje e veçantë iu kushtua rolit të Bashkëpunimit Zviceran në terren, i cili përmes projekteve të ndryshme mbështet zhvillimin institucional, përmirësimin e shërbimeve publike dhe nxitjen e progresit gjithëpërfshirës.
Ambasadori Meidani shprehu mirënjohje për Innox Center për mikpritjen dhe për krijimin e një hapësire që promovon dialogun konstruktiv dhe shkëmbimin e ideve ndërmjet aktorëve të ndryshëm shoqërorë.
Takimi u vlerësua si një hap i rëndësishëm drejt forcimit të bashkëpunimit dhe ndërtimit të urave mes diplomacisë, shoqërisë civile dhe mediave në funksion të agjendës evropiane të vendit.
