Melinda Gates rrëfen momentin e vështirë kur vendosi të ndahej nga Bill Gates.
Pas gati tre dekadash martesë, Melinda Gates mori një nga vendimet më të rëndësishme të jetës së saj: t’i jepte fund lidhjes me bashkëshortin e saj, Bill Gates.
Në librin e saj të papublikuar, “The Next Day”, Melinda rrëfen momentin kur i komunikoi themeluesit të Microsoft dëshirën për t’u ndarë.
Filantropistja tregon se në shkurt të vitit 2020, ajo kishte planifikuar një udhëtim vetëm për vete në New Mexico, por më pas vendosi të ftonte edhe Bill. Pasi mbërritën, Melinda zbuloi se shtëpia me qira ku do të qëndronin ishte e disponueshme vetëm sepse çifti që jetonin aty më parë ishin ndarë.
Edhe pse përpiqeshin ta trajtonin këtë udhëtim si një pushim të zakonshëm, Melinda vendosi që në natën e fundit t’i shprehte Bill-it dëshirën për të jetuar të ndarë. Në atë kohë, vajza e tyre më e vogël, Phoebe, ishte maturante në shkollë të mesme, ndaj Melinda propozoi që të qëndronte me të në shtëpinë e tyre në Seattle deri në përfundimin e shkollës.
“Ishte një nga bisedat më të frikshme që kam pasur ndonjëherë”, shkruan ajo në një fragment të librit të siguruar nga revista People. Melinda shton se Bill ishte “i trishtuar dhe i mërzitur”, por njëkohësisht “mirëkuptues dhe i respektueshëm”.
Pasi u kthyen në shtëpi, çifti vijoi të paraqitej si një front i bashkuar në mbështetje të Fondacionit Gates. Megjithatë, Melinda e kishte marrë tashmë vendimin për t’i dhënë fund martesës 27-vjeçare.
Në verën e atij viti, ata zhvilluan një bisedë të gjatë dhe herë pas here “të ndjerë”, gjatë së cilës Melinda i tha Bill-it se dëshironte të divorcohej.
“Bill ka reputacionin e një prej negociatorëve më të ashpër në botë”, shkruan ajo, duke reflektuar mbi sfidat e muajve të ardhshëm.
Melinda, 60 vjeç, zbulon gjithashtu se përjetoi sulme paniku gjatë kësaj periudhe. Edhe pse procesi i divorcit ishte i gjatë dhe i vështirë, gjithçka u përmbyll shpejt sapo arritën një marrëveshje.
Në maj 2021, Bill dhe Melinda publikuan një deklaratë të përbashkët ku njoftuan ndarjen e tyre.
Një vit më vonë, Melinda rrëfeu se miqësia e ish-bashkëshortit të saj me të dënuarin për krime seksuale, Jeffrey Epstein, ndikoi në vendimin e saj për t’u ndarë. Në një deklaratë për CBS, miliarderi e quajti marrëdhënien e tij me Epstein një “gabim”.
Melinda theksoi gjithashtu se kishte humbur besimin te Bill pas një tradhtie të dyshuar me një punonjëse të Microsoft-it.
Ish-çifti kanë tre fëmijë: Jennifer, 28 vjeç, Rory, 25 vjeç dhe Phoebe, 22 vjeç.
