Shkup, 21 maj – Kryeministri Hristian Mickoski thotë se nuk e di emrin e guvernatorit të ri të Bankës Popullore, por paralajmëroi se do të takohet me presidenten e shtetit e cila pritet që gjatë ditës ta dorëzojë propozimin në Kuvend.
“Nuk e di emrin. Menjëherë pas kësaj ngjarje do të kem takim me presidenten dhe supozoj se do ta marr vesh emrin”, deklaroi Mickoski gjatë vizitës së sotme në Klinikën e Gjinekologjisë dhe Obstetrikës.
I pyetur nëse do ta mbështesë propozimin për guvernator të cilin do ta propozojë presidentja Siljanovska – Davkova ose kjo do të varet nga ajo se kush do të propozohet, Mickoski tha se i di emrat e kandidatëve të cilët patën bisedë me presidenten dhe se për të gjithë ata ka mendim.
Sot pritet të bëhet i ditur propozimi për guvernator të cilin do ta propozojë presidentja Siljanovska – Davkova. Ajo në deklaratë për mediat tha se procedura do të përfundojë para se të shkojë për Itali, duke konfirmuar se guvernator do të jetë një nga kandidatët të cilët përmenden në publik.
“Nuk thuhet kurrë publikisht më parë, por përkundrazi i dërgohet organit dhe Kuvendi vendos. Kjo do të finalizohet sot para se të nisem për në Itali”, tha Siljanovska Davkova në një deklaratë për gazetarët pas Forumit të sotëm mbi Diplomacinë Kulturore të mbajtur në kabinetin e saj.
Në mesin e tre kandidatëve për guvernator janë guvernatorja aktuale Anita Angellovska-Bezhoska, profesori në Fakultetin Ekonomik në Shkup Trajko Sllaveski dhe ish-ministri i Financave Zoran Stavreski. Mandati i guvernatores aktuale Anita Angellovska Bezhoska skadon sot, por ligji përcakton që ajo duhet të mbajë detyrën deri në zgjedhjen e një guvernatori të ri. Angellovska Bezhoska mori detyrën më 22 maj 2018.
