Petraq Milo, sekretar për Çështjet e Financave dhe Ekonomisë në Partinë e Lirisë, tha sot në një deklaratë për mediet se “niveli i të ardhurave tatimore të Shqipërisë vazhdon të jetë mbrapa vendeve të tjera dhe nën nivelin potencial”.
Sipas Milos “Shqipëria ka raportin më të ulët të eficiencës së të ardhurave të mbledhura në rajon, si rezultat i pragjeve të shumta dhe përjashtimeve, që inkurajojnë nëndeklarimin dhe dobësojnë zbatimin e sistemit fiskal”.
“Forcimi i administrimit, reduktimi i pabarazisë në trajtimin tatimor të sektorëve të caktuar të ekonomisë, dhe reduktimi i informalitetit do të ndihmonte në ngritjen e mbledhjes së taksave drejt mesatares së BE-së,” nënvizoi Milo.
Milo shtoi më tej se “rritja e të ardhurave është e domosdoshme për t’iu përgjigjur rritjes së presioneve të shpenzimeve për arsimin, shëndetësinë, pensionet dhe kujdesit social”.
Gjithashtu, tha Milo, është e domosdoshme dhe ka hapësirë për përmirësimin e përbërjes dhe cilësisë së shpenzimeve publike.
“Më shumë fonde duhet të drejtohen drejt arsimit publik – veçanërisht në nivelin a arsimit të mesëm dhe të lartë – si dhe shpenzimet e kujdesit shëndetësor,” tha Milo.
Milo u shpreh ndër të tjera se “mbulimi dhe shtrirja e asistencës sociale për të varfërit në Shqipëri është mbrapa standardit të krahasueshëm me vendet e tjera dhe mund të rritet më tej nëpërmjet riprioritizimit të shpenzimeve, propozim që Partia e Lirisë ka paraqitur me amendamentet e saj në Parlament”.
