Shkup, 1 shtator – Ministri i Punëve të Jashtme dhe Tregtisë së Jashtme, Timço Mucunski sot dhe nesër do të qëndrojë në Republikën e Sllovenisë, ku do të marrë pjesë në forumin strategjik të Bledit.
Në kuadër të forumit, Mucunski do të mbajë fjalim në panel-diskutimin në temën “Nuk ka rajon për të rinjtë – është koha për ndryshime”, kumtoi Ministria e Punëve të Jashtme dhe Tregtisë së Jashtme. Sesioni do të bashkojë ministrat e punëve të jashtme dhe ekspertë të rinj nga rajoni, duke ofruar mundësi unike për t’u përballur me sfidat dhe për të shqyrtuar nevojat reale për transformim themelor.
Përveç pjesëmarrjes në programin zyrtar, Mucunski do të marrë pjesë edhe në një mëngjes pune me ministrat e punëve të jashtme të rajonit, ku do të bëhet shqyrtim i gjendjes aktuale dhe sfidave në Ballkanin Perëndimor.
Në margjinat e forumit, janë planifikuar edhe disa takime dypalëshe me ministra dhe përfaqësues të organizatave ndërkombëtare.
