Moskë, 7 mars – Ministria ruse e Punëve të Jashtme sot i ka bërë thirrje ambasadores së SHBA-së në Moskë, Lin Trejsi që të ndërpresë mbështetjen për tre organizata joqeveritare që janë shpallur “të padëshirueshme” në Rusi.
Ministria në ueb-faqen e saj ka njoftuar se po kërkon që Trejsi të ndalojë së ofruari çdo ndihmë për Këshillat amerikanë për arsimin ndërkombëtar, perspektivat kulturore dhe institutin e arsimit ndërkombëtar.
Ministria pretendon se me mbështetjen e Ambasadës amerikane, këto organizata po zbatojnë programe dhe projekte anti-ruse që synojnë rekrutimin e agjentëve të ndikimit nën maskën e shkëmbimeve arsimore dhe kulturore.
Ministria paralajmëroi se “përpjekjet për të ndërhyrë në punët e brendshme të Rusisë” do të “shtypeshin ashpër dhe me vendosmëri”, duke përfshirë dëbimin e stafit të ambasadës amerikane të përfshirë në veprime të tilla.
