Shkup, 23 korrik – Në kuadër të përpjekjeve për përmirësimin e klimës investuese në Republikën e Maqedonisë së Veriut, zëvendësdrejtori i Drejtorisë së Doganave, Mustafa Dauti, realizoi një takim pune me drejtorin e Agjencisë për Investime të Huaja dhe Promovim të Eksportit, Refik Xhemaili.
Në këtë takim u theksua rëndësia e thellimit të bashkëpunimit ndërinstitucional, si një element kyç për tërheqjen e investimeve të huaja dhe nxitjen e eksportit vendor. Palët u pajtuan për disa masa konkrete që synojnë:
- Mbështetje të shtuar për kompanitë eksportuese, përmes shkëmbimit të informacionit në kohë reale dhe koordinimit operacional;
- Krijimin e një kornize rregullatore transparente dhe konkurruese, që do të lehtësojë hyrjen dhe veprimtarinë e investitorëve të huaj;
- Avancimin e digjitalizimit në proceset që lidhen me dokumentacionin doganor dhe investimet, në mënyrë që të rritet efikasiteti dhe transparenca.
Të dy institucionet shprehën gatishmërinë për krijimin e një mekanizmi të përhershëm komunikimi dhe koordinimi, i cili do të ndihmojë në zgjidhjen e shpejtë të sfidave në terren dhe do të përmirësojë shërbimet për bizneset.
Ky bashkëpunim përbën një hap të rëndësishëm drejt ndërtimit të një klime të qëndrueshme dhe atraktive afariste, me qëllim zhvillimin ekonomik të qëndrueshëm dhe rritjen e investimeve të huaja direkte.
“Angazhimi ynë i përbashkët është i qartë: institucione më efikase, rregullore të parashikueshme dhe mbështetje konkrete për rritje ekonomike,” theksohet në përfundim të takimit.
