Shkup, 24 mars – Nënshkruhet Memorandum bashkëpunimi me Fondacionin SIZIGIA për realizimin e trajnimeve për personat në rrezik me qëllim përfshirjen e tyre në ndërmarrjet sociale dhe krijimin e vendeve të punës gjithëpërfshirëse
Në Ministrinë e Politikës Sociale, Demografisë dhe të Rinjve u nënshkrua Memorandum për Bashkëpunim ndërmjet Ministrisë dhe SIZIGIA Shkup – Fondacioni për krijimin e ekosistemeve, inovacioneve dhe bartjes së njohurive për zhvillim personal dhe afarist.
Me Memorandumin e nënshkruar nga ministri Fatmir Limani dhe znj. Suzana Trajkovska Koçankovska nga SIZIGIA, Ministria shpreh mbështetjen për aktivitetet e fondacionit përmes projektit “Mjellma e Zezë” – i cili ka për qëllim mbështetjen e personave në rrezik duke ofruar trajnime për përfshirjen e tyre në ndërmarrjet sociale dhe krijimin e vendeve të punës gjithëpërfshirëse në kontekstin e ndërmarrjeve sociale.
Projekti “Mjellma e Zezë” financohet nga Ministria e Politikës Sociale, Shëndetit dhe Mbrojtjes së Konsumatorit të Republikës së Austrisë, që ka filluar më 25.01.2025 me një periudhë zbatimi 12 mujore.
I njëjti zbatohet në bashkëpunim me Impact Hub Austria dhe Fondacionin SIZIGIA me synimin për të inkurajuar të rejat (15-24 vjeç) që nuk janë të punësuara, as në arsim apo trajnim (NEET), si dhe personat me aftësi të kufizuara, për të përmirësuar aftësitë e tyre dhe mundësitë e punësimit përmes trajnimeve, punës praktike në kompani dhe sipërmarrje sociale.
Realizimi i aktiviteteve të projektit “Mjellma e Zezë” do të realizohet në Qendrën për Ndërmarrje Sociale, e cila me vendim të Qeverisë së Republikës së Maqedonisë së Veriut i është dhënë në përdorim të përhershëm Ministrisë së Politikës Sociale, Demografisë dhe të Rinjve. Realizimi i aktiviteteve është pa pagesë të kompensimit nga fondacioni për shfrytëzimin e Qendrës.
