Shkup, 27 qershor – Ka përfunduar spini dhe ndërtimi i skandalit për ndërtimet pa leje në Çair – një spin i drejtuar kundër Qeverisë nga kryetarja e Shkupit, Danella Arsovska – dhe kjo përfundoi me heshtjen e saj të shkurtër, deklaroi zëvendëskryeministri dhe ministri për Transport dhe Lidhje, Aleksandar Nikolloski, nga foltorja e Kuvendit.
“Ministria e Transportit dhe Lidhjeve ka kompetenca të veprojë vetëm për objektet e kategorisë A, ndërsa për ndërtimet për të cilat flet çdo ditë kryetarja e Shkupit, kompetent është Qyteti,” deklaroi Nikolloski dje, duke iu përgjigjur një pyetjeje të deputetes Slavjanka Petrovska, nëse kanë kontrolluar çfarë po ndodh në Komunën e Çairit, ku, sipas postimeve të kryetares së Shkupit, po ndërtohen objekte pa leje.
Nikolloski e vlerësoi paraqitjen e Danella Arsovskës si spektakël, duke theksuar se pushteti i qytetit ka të drejtë të veprojë nëse konstatohet se disa objekte janë ndërtuar pa leje.
“Mendoj se është e drejtë që opinioni të informohet se përgjegjësia e plotë është te kryetari i Qytetit të Shkupit përmes inspektoratit ndërtimor përkatës dhe në vend që të bëhen spektakle, le të dalin me inspektoratin ndërtimor dhe ta konstatojnë gjendjen. Nëse ka ndërtim pa leje, ato duhet të prishen. Nëse ndërtuesi nuk dëshiron t’i prishë, atëherë Qyteti duhet të shpallë tender për një kompani që do t’i shembë, dhe pastaj shpenzimet bien mbi atë që ka ndërtuar pa leje. Dhe të dorëzojë kallëzim përkatës në prokurorinë kompetente dhe të përgjigjet penalisht. Gjithashtu, nëse objekti është ndërtuar në tokë që është pronë e Republikës së Maqedonisë, siç ka indikacione në opinion, atëherë ajo pasuri duhet të konfiskohet,” theksoi Nikolloski.
Sipas tij, e gjithë kjo veprimtari e Arsovskës lidhur me ndërtimet pa leje është spektakël publik i motivuar nga partia politike BDI dhe funksionarë të lartë të saj, me të cilët kryetarja ka lidhje të caktuara.
