Rreth 40 mijë persona, që mbushin çdo vit moshën e daljes në pension, përmes ndryshimeve ligjore, nuk do ta kenë më të nevojshme që t’i drejtohen gjykatës për t’iu njohur vitet e punës përpara ’94-s që u mungojnë, pasi njohja e tyre do të bëhet automatikisht nga Instituti i Sigurimeve Shoqërore.
Gjatë punimeve në Komisionin për Çështjet Ligjore, në Kuvendin e Shqipërisë, Kreu i Institutit të Sigurimeve Shoqërore, Astrit Hado tha se prej kësaj nisme do të përfitojnë edhe ata, të cilët janë në procedura administrative.
“Ne e kemi diskutuar këtë gjë dhe kemi vendosur që do t’u njihen të gjithë atyre qytetarëve, të cilit mbushin moshën për të dalë në pension në momentin e hyrjes në fuqi të ligjit dhe ata të cilat janë në procedura administrative. Që do të thotë, kush është në gjyq, kush është në ankimim administrativ, do t’i pezullojmë automatikisht procedurat e ankimimit dhe do t’ua njohim edhe këtyre njerëzve. Ndërsa, ata të cilët kanë dalë në pension, kanë shkuar në gjykatë, e kanë rrëzuar ose nuk e kanë ndjekur rrugën gjyqësore, nuk do t’u njihen. Sepse nëse do të hapej kjo gjë, dhe do t’u njihej të gjithëve, i bie që teknikisht dhe teorikisht të rillogariten teknikisht 720 mijë pensione”, tha Hado.
Komisioni për Çështjet Ligjore, Administratën Publike dhe të Drejtat e Njeriut i Kuvendit miratoi sot ndryshimet ligjore të propozuara nga qeveria që i hapin rrugë njohjes automatike të periudhës së vjetërsisë në punë, për efekt pensioni të punonjësve në ish-ndërmarrjet shtetërore, institucione shtetërore, në ish-ndërmarrje bujqësore dhe në ish-kooperativat bujqësore të para vitit 1994.
