Shkup, 11 korrik – Partia maqedonase OBRM-PDUKM në një kumtesë për media thotë se Bullgaria është ekspozuar para Evropës dhe botës, duke shtuar se “është konfirmuar një padrejtësi tjetër ndaj Maqedonisë se nuk bëhet fjalë për bullgarët në Kushtetutë, por për identitetin dhe gjuhën maqedonase”.
“Gënjeshtrat e Zaevit se “na duhet vetëm të ndryshojmë emrin dhe do të hyjmë në BE”, si dhe sigurimet e Osmanit dhe Kovaçevskit se “na duhet vetëm të përfshijmë bullgarët në Kushtetutë dhe do të hyjmë në BE”, janë zhytur në ujë, ajo që OBRM-PDUKM e ka thënë vazhdimisht se problemi është më i madh dhe ka të bëjë me identitetin dhe gjuhën është konfirmuar. Politikat e Zaevit dhe Filipçes “një popull, dy shtete” dhe “Delçevi është bullgar” tani kanë lënë gjurmën e tyre”, thonë nga OBRM-PDUKM.
“Bullgaria është ekspozuar para Evropës dhe botës, e vërteta për atë që OBRM-PDUKM pretendonte vitet e fundit ka dalë në dritë, se nuk bëhet fjalë vetëm për futjen e pakicës bullgare në Kushtetutë, por për gjuhën maqedonase dhe identitetin e popullit maqedonas. Parlamenti Evropian miratoi Raportin për Maqedoninë, por fshiu identitetin dhe gjuhën maqedonase prej saj. E gjithë bota pa padrejtësitë maqedonase në shekullin e 21-të. Maqedonia nga vitet ’90 deri në ditët e sotme në rrugën e saj drejt BE-së, bëri shumë lëshime, shumë ndryshime dhe pësoi shumë poshtërime”.
“Për më tepër, një kontribut të madh në poshtërimet ndaj Maqedonisë dhe popullit maqedonas gjatë gjithë historisë sonë kanë dhënë kuislingë vendas, politikanë të korruptuar dhe udhëheqës të papërgjegjshëm, të cilët, për shkak të qëllimeve fitimprurëse, nuk i morën fare parasysh qëllimet afatgjata dhe interesat kombëtare të Maqedonisë”, thonë nga OBRM-PDUKM.
Më tej shtojnë se “bullgarët më në fund janë ekspozuar dhe janë nxjerrë në dritë se nuk bëhet fjalë për teknikalitete dhe pakicën bullgare në Kushtetutë, por për thelbin”.
“Bujari dhe Kovaçevski dhe Zaevi, Filipçe, Mariçiq dhe të gjithë të tjerët që tani përballen me këtë e dinin këtë. Zaevi, Kovaçevski, Osmani dhe të tjerët, pavarësisht se dinin për sfondin e këtyre kërkesave, pranuan gjithçka që u ishte vënë në tryezë, vetëm për një ditë më shumë në pushtet dhe kështu i dhanë një instrument në duart e Bullgarisë për të bllokuar dhe vënë veton integrimeve në BE. Zaev, Osmani, Kovaçevski e dinin se aktivitetet dhe veprimet e Bullgarisë kanë një agjendë dhe plan të qartë për të shkatërruar Maqedoninë. Ajo që është e rëndësishme është se kjo do të mbetet e shënuar në histori për herë të parë në Maqedoninë e pavarur, se raporti evropian me identitet maqedonas dhe gjuhë maqedonase kaloi në AFET, Komitetin e Politikës së Jashtme të Parlamentit Evropian dhe para se të miratohej ai amendament i turpshëm, u gjend në tryezën e të gjithë eurodeputetëve që votuan brenda Parlamentit Evropian”, thonë nga OBRM-PDUKM.
