Shkup, 30 qershor – Vërtet i besoni Musave, Bujarëve, Azizave, Rizvanëve, Artanëve e të tjerëve të këtij lloji?!
Vërtet mendoni se shqiptarët janë 29% dhe se qenka arritje epokale e BDI-së regjistrimi i vitit 2021?!
Një mend e keni se ne shqiptarët në këtë territor jemi vetëm 29%?
Regjistrimi i vitit 2021 është farsë, është mashtrim i madh, është fytyra e vërtetë e BDI-së si organizatë parapolitike. Aty janë të ngërthyera elaboratet dhe projektet më famëkeqe sllave, të hartuara para dy shekujsh, të trashëguara dhe të përpunuara edhe sot, pa ndryshuar as synimin, as esencën, as pikë e presje.
Për ta kthjelluar mendjen kolektive të shqiptarëve dhe për ta kuptuar këtë soj e sorollop manipuluesish e që bartin në esencë idetë më morbide antishqiptare, ja vetëm tre fakte të vogla që tregojnë një realitet krejt ndryshe nga ai që paraqitet:
1. Nataliteti i shqiptarëve në këtë vend është 35%, sipas po të njejta institucioneve që e kanë bërë regjistrimin e popullatës, pra 6% më shumë se 29%, pa përfshirë lindshmërinë e shqiptarëve në diasporë, një faktor që do ta ndryshonte drastikisht këtë përqindje.
2. Regjistrimi i fëmijëve shqiptarë në klasë të parë është rreth 34-35%, shifër pothuaj identike me natalitetin në vend. Normalisht edhë këtu pa përfshihirë pjesën më të lendueshme të kombit, diasporën.
3. Bashkësia Islame për nevoja të tyre i ka statistikat e veta për përkatësinë fetare të familjeve: islame, orthodokse dhe katolike. Këto të dhëna zbulojnë të vërtetën e madhe që institucionet sllave, bashkë me parapolitikën, përpiqen ta mbajnë të fshehur dhe të manipuluar përqindjen e vërtetë të etnive.
Sipas të dhënave zyrtare nga ky institucion, 45-50% e familjeve në vend i takojnë përkatësisë islame.
Në fund, vërtet mendoni se një shteti i duhet një operacion statistikor për të regjistruar popullsinë dhe për të përcaktuar saktësisht përqindjen e etnive në vend?
A mendoni se shteti i shekullit XXI është pa teknologji moderne, pa Ent Shtetëror të Statistikave, pa Ministri të Punëve të Brendshme, pa ekspertë dhe institucione të IT-së –të cilat me një klikim të vetëm, për pak sekonda mund të nxjerrë të dhëna me saktësi të lartë?
Stop!
Thuani JO parapolitikës, shërbëtorëve dhe sharlatanëve, që mision kanë gënjeshtrën, manipulimin dhe mashtrimin, sepse vetëm në këto ujëra të pista dhe të helmuara mund të mbijetojnë.
*Orhan Ibrahimi, ish-deputet
